Os avisos serven para dar a coñecer os comunicados de carácter urxente, licitacións abertas, rúas cortadas ao tráfico e desvíos alternativos.



CONVIVENCIA

Incidencias Policía Local

Dende as 08:00 horas do día 21/02/2019 ata as 08:00 horas do día 22/02/2019
- LOCALIZACIÓN PERMANENTE: De dúas persoas (arresto domiciliario).
- EDUCACIÓN VIARIA: Impártese módulo formativo a alumnado de 4º de Primaria do Colexio Manuel Peleteiro.
12:25 ACCIDENTE DE TRÁFICO: Na rúa Doutor Teixeiro, entre dous vehículos, con danos materiais.
15:35 ACCIDENTE DE TRÁFICO: Na rotonda da avenida de Lugo co Hórreo, entre un turismo e un autobús. Parte amigable.
21:50 INCENDIO: Nun inmoble abandonado da rúa Valiño. Interveñen os Bombeiros.
RUÍDOS EN PISOS: Acódese a varios pisos.

CONVIVENCIA E MOBILIDADE

Corte de tráfico na avenida de Quiroga Palacios e modificacións no transporte urbano (sábado 23)

Con motivo de traballos de arranxo da calzada da avenida de Qurioga Palacios, esta rúa vai quedar cortada ao tráfico o vindeiro sábado, 23 de febreiro, entre as 8:30 e as 20:30 horas.

Este corte suporá cambios na circulación pola zona, inverténdose o sentido da circulación habitual do camiño da Ameixaga:

- A primeira parte das obras, situadas no lateral do Seminario Menor, provocará que os vehículos que circulen pola rúa de Belvís e polo parque de Belvís deban facer este percorrido polo camiño da Ameixaga cara a avenida de Lugo. Os vehículos que baixen pola rúa das Fraguas poderán seguir polo percorrido normal, é dicir, pola rúa do Canteiro e Quiroga Palacios.

- A segunda parte das obras, que afectan ao tramo da rúa comprendido entre a rúa do Bispo Teodomiro e a costa do Vedor, provocará que os vehículos que circulen pola corredoira das Fraguas deban baixar pola rúa do Bispo Teodomiro e dende aí, pasando polo primeiro tramo de obras, acceder ao camiño da Ameixaga cara a avenida de Lugo.
Ao longo da xornada, neste segundo tramo de obras verase afectado polo corte algún garaxe, ao que non se poderá acceder ou saír do mesmo durante un período aproximado dunha hora.

Transporte urbano
A consecuencia deste corte, durante o período indicado, a liña 13 do transporte urbano será desviada, realizando o seguinte percorrido:

- O autobús da liña rematará o percorrido na parada 86, no carril de servizo da avenida de Lugo, antes do cruce con Quiroga Palacios. Dende esa parada iniciará tamén o novo traxecto cara Xeneral Pardiñas.

Quedarán suprimidas as paradas: 91, avenida de Lugo nº 151; 677, camiño da Ameixaga nº 8; 111, avenida de Teodomiro (Seminario Menor); 416, Quiroga Palacios nº 10; e 417, Quiroga Palacios nº 54.

O Concello de Santiago de Compostela prega á cidadanía desculpe as molestias que estas alteracións no tráfico lles poidan ocasionar.

TECNOLOXÍA

Servizo de atención gratuíto con motivo do despregamento do 4G móbil na banda de 800 MHz e da súa afectación á TDT

Os servizos móbiles de nova xeración LTE sobre a banda de frecuencias de 800 MHz dos principais operadores móbiles que prestan servizos no territorio nacional, comercialmente denominados como 4G, están sendo implantados en Santiago de Compostela. Esta tecnoloxía, anteriormente utilizada pola Televisión Dixital Terrestre (TDT), permite ofrecer mellores prestacións sobre esta tecnoloxía.

A prestación dos servizos móbiles nesta banda pode implicar a aparición de determinadas afectacións na recepción do sinal da TDT. Por iso, o Ministerio de Industria, Enerxía e Turismo estableceu un procedemento de actuación para solucionar de xeito gratuíto este tipo de problemas.

En caso de producirse estas afectacións, os/as cidadáns/ás teñen á súa disposición un teléfono de atención gratuíto, 900 833 999, e unha páxina web, www.llega800.es, medios a través dos cales se poderán solicitar as actuacións para que o servizo de TDT poida restablecerse con total normalidade.

Direccións relacionadas

CONVIVENCIA

Corte ao tráfico da rúa de Pitelos con motivo dunha nova fase das obras de Castrón Douro e Patio de Madres

Con motivo dunha nova fase das obras de reurbanización das rúas do Castrón Douro e do Patio de Madres, dende luns 28 de xaneiro vai quedar cortada ao tráfico a rúa de Pitelos.

Córtase a entrada na rúa de Pitelos dende Patio de Madres, polo que só poderán acceder a Pitelos os/as residentes da rúa, realizando tanto a entrada como a saída dende a rúa do Hórreo. Debido a este dobre sentido de circulación, prohíbese o estacionamento no tramo comprendido entre a rúa do Hórreo e a ruela de Pitelos. O resto da rúa de Pitelos queda para o estacionamento dos/das residentes.

Os demais cortes de tráfico seguen como ao inicio da obra. Así, continúa invertido o sentido da circulación da rúa do Patio de Madres dende a rúa de García Blanco, quedando de saída cara a rúa da Fonte de Santo Antonio.

Tamén a ruela de Pisón permanece cortada á circulación, con acceso unicamente para os/as usuarios/as dos garaxes existentes, entrando e saíndo pola rúa do Pexigo de Arriba. Esta segue na súa totalidade dunha soa dirección, sentido baixada cara a praza de Marcial Villamor Varela. Só poden circular por ela os residentes da zona.

Desvío da liña 7 do transporte urbano
Do mesmo xeito, os cortes seguen afectando á liña 7 do transporte urbano, que baixaba por Patio de Madres en sentido Aríns e Fornás. Así, os autobuses desta liña, con saída da rúa de Valle-Inclán, fan o seu percorrido habitual ata a parada da praza de Galicia, dende onde se desvían por Doutor Teixeiro, rúa do Hórreo, avenida de Lugo, Bernardo Barreiro e Curros Enríquez, para continuar o percorrido habitual polo barrio de Sar.

Quedou suprimida a parada da rúa de Patio de Madres. Os usuarios desta parada poden dirixirse á parada próxima da rúa Fonte de Santo Antonio nº 3. A parada situada na rúa Castrón Douro, cruce con Curros Enríquez, realízase no mesmo cruce, pero na rúa de Curros Enríquez, por onde vén o autobús desviado.

Este desvío permanecerá ata o final completo das obras.

O Concello de Santiago de Compostela prega á cidadanía desculpe as molestias que estas alteracións no tráfico lles poidan ocasionar.

CONVIVENCIA

Corte de tráfico na rúa das Casas Reais (do 28 de xaneiro ao 28 de febreiro)

Con motivo de traballos de reparación de lousas, a rúa das Casas Reais, no tramo comprendido entre Porta do Camiño e a rúa da Algalia de Abaixo, quedará cortada ao tráfico dende as 10:30 horas do luns 28 de xaneiro ata o 28 de febreiro.

O Concello de Santiago de Compostela prega á cidadanía desculpe as molestias que estas alteracións no tráfico lles poidan ocasionar.

Compartir: