Os avisos serven para dar a coñecer os comunicados de carácter urxente, licitacións abertas, rúas cortadas ao tráfico e desvíos alternativos.



CONVIVENCIA

Incidencias Policía Local

Dende as 08:00 horas do día 25/04/2018 ata as 08:00 horas do día 26/04/2018
FESTAS EN SAN MARCOS: Sen incidencias.
19:42 ACCIDENTE DE CIRCULACIÓN: Na avenida das Ciencias, segundo testemuñas, un vehículo causa danos materiais noutro.
03:30 FESTA EN PISO: Acódese a un piso.

XUNTA DE GOBERNO

Orde do día da Xunta de Goberno Local do venres 27 de abril

Adxúntase convocatoria e orde do día da sesión ordinaria da Xunta de Goberno Local prevista para o venres 27 de abril.

Direccións relacionadas

CONVIVENCIA

Cortes de tráfico por mor da carreira SantYaGo10K (28 de abril)

O sábado 28 de abril celebrarase na cidade a IV carreira SantYaGo10K. Circuíto Patrimonio da Humanidade, na que está previsto que participen arredor de 2.000 atletas. Durante a proba, as rúas que forman parte do percorrido sufrirán alteracións circulatorias.

O itinerario da carreira é o seguinte: saída na rúa de San Francisco, Campiño de San Francisco, avenida de Xoán XXIII, avenida do Burgo das Nacións, avenida de Castelao, rúa de Vista Alegre, rúa do Avío, rúa de Vista Alegre, rúa das Salvadas, rúa de Morón, rúa dos Castiñeiros, Campiño de San Francisco, costa de San Francisco, rúa de Entrerríos, rúa de Galeras, rúa do Pombal, paseo dos Leóns, paseo da Ferradura, paseo central da Alameda, Campo da Estrela, avenida de Xoán Carlos I, Campo da Estrela, rúa da Senra, praza de Galicia, rúa da Fonte de Santo Antonio, Tránsito da Mercé, rúa da Ensinanza, rúa da Virxe da Cerca, rúa do Astrónomo Aller Ulloa, Porta do Camiño, rúa das Rodas, rúa da Algalia de Abaixo, rúa das Casas Reais, rúa Travesa, rúa de San Bieito, rúa de Santo Agostiño, praza de Santo Agostiño, rúa das Ameas, praciña de San Fiz, Travesa da Universidade, praza da Universidade, praza de Mazarelos, Tránsito dos Gramáticos, rúa do Cardeal Payá, rúa das Orfas, rúa da Caldeirería, rúa do Preguntoiro, praza de Cervantes, rúa da Acibechería, Vía Sacra, rúa de San Paio de Antealtares, rúa da Conga, rúa Nova, Cantón do Toural, praza do Toural, rúa do Vilar, praza das Praterías, rúa de Fonseca e chegada na praza do Obradoiro.

Este percorrido estará pechado ao tráfico entre as 21:30 e as 23:00 horas do sábado 28 de abril, día da carreira. Neste período, realizaranse os seguintes desvíos:

- Os vehículos que circulen pola rúa de Rosalía de Castro serán desviados pola rúa de Montero Ríos.
- Os vehículos procedentes da rúa do Romaño serán desviados dende a rotonda do Avío cara a avenida de Castelao.
- Os vehículos que suban polo Hórreo serán desviados cara a rúa de Doutor Teixeiro, ao igual que os que saian da rúa Xeneral Pardiñas.
- Os vehículos que circulen pola rúa Galeras irán obrigatoriamente cara San Lourenzo.

Os/as veciños/as que teñan garaxes nas rúas que comprende o itinerario non poderán entrar nin saír dos mesmos durante o tempo que dure a carreira, entre as 21:30 e as 23:00 horas.

Todas estas restricións do tráfico afectarán tamén ao transporte urbano. Os servizos afectados por liña e sentido, así como as paradas suprimidas, poden consultarse no enlace adxunto.

O Concello de Santiago de Compostela prega á cidadanía desculpe as molestias que estas alteracións no tráfico lles poidan ocasionar.

Documentos relacionados

CONVIVENCIA

Corte de tráfico na rúa da Acibechería (do 9 ao 27 de abril)

Con motivo das obras de mantemento e reparación de pavimentos da Cidade Histórica, dende o vindeiro luns, 9 de abril, e ata o venres 27, permanecerá cortada ao tráfico a rúa da Acibechería, no tramo comprendido entre a praza de Cervantes e o entronque coa Vía Sacra.

Os vehículos autorizados deberán seguir dende a vía Sacra cara a praza da Inmaculada.

O Concello de Santiago de Compostela prega á cidadanía desculpe as molestias que estas alteracións no tráfico lles poidan ocasionar.

CONVIVENCIA

Corte de tráfico no Cantón do Toural (do 23 de abril ao 7 de maio)

Con motivo das obras de mantemento e reparación de pavimentos da Cidade Histórica, dende o luns 23 de abril e ata o luns 7 de maio permanecerá cortado ao tráfico o Cantón do Toural, no tramo comprendido entre a rúa Nova e a praza do Toural.

Permitirase o paso dos vehículos autorizados dende a rúa das Orfas cara a rúa Nova.

O Concello de Santiago de Compostela prega á cidadanía desculpe as molestias que estas alteracións no tráfico lles poidan ocasionar.

CONVIVENCIA

Corte ao tráfico da avenida de Vilagarcía

O luns 16 de abril arrincan as obras de reurbanización da avenida de Vilagarcía, que teñen unha duración prevista de oito meses. Con motivo do inicio da primeira fase destas obras, dende o martes, 17 de abril quedará cortado á circulación o tramo da avenida de Vilagarcía comprendido entre a praza de Vigo e a avenida de Romero Donallo. Este corte implica as seguintes restricións:

- Suprímese a saída á avenida de Romero Donallo dende a praza de Vigo. Os vehículos que accedan a esta praza terán que facer o percorrido pola rúa Nova de Abaixo para saír as rúas contiguas, ou bordear a praza para saír de novo á avenida de Rosalía de Castro, en dirección centro cidade.

- Só poderán acceder a este tramo en obras as persoas usuarias dos garaxes. Segundo avancen as obras, os vehículos poderán acceder dende a praza de Vigo ou dende a avenida de Romero Donallo.

- Elimínase a carga e descarga neste tramo, tendo que realizarse a mesma dende as prazas existentes na praza de Vigo, nas que se amplía o horario, pasando a ser de 7:30 a 19:00 horas para proporcionar un mellor servizo.

O Concello de Santiago de Compostela prega á cidadanía desculpe as molestias que estas alteracións no tráfico lles poidan ocasionar.

ALCALDÍA

Calendario 2018

Descarga aquí o calendario municipal para 2018

Direccións relacionadas

CONVIVENCIA

Precaución no paso dos vehículos autorizados pola rúa do Vilar

A Concellaría de Convivencia advirte aos transportistas con autorización de acceso ao Casco Histórico e aos condutores/as de vehículos de servizos da necesidade de ter especial coidado co gálibo do balcón existente á altura do número 15 da rúa do Vilar.

Calquera vehículo, plataforma ou instalación superior á 3,5 metros é susceptible de causar danos na cantería deste balcón, e así se veñen reiterando os choques contra este balcón. Por este motivo, reitérase aos condutores/as que deben ter coidado ao pasar pola rúa do Vilar para non chocar contra o devandito balcón.

Compartir: