FESTAS
A programación da Festa do Banquete prevista para o domingo 22 trasládase ao vindeiro domingo 29 de maio debido o mal tempo
Por mor da previsión meteorolóxica para este domingo 22 de maio, anúlanse todos os actos programados da Festa do Banquete que estaban previstos na Carballeira de Conxo, e trasládanse ao vindeiro domingo, 29 de maio. As actividades de hoxe venres 20, e mañá sábado 21, manterase sen ningún cambio na programación. O Mercado do Libro e da Artesanía na praza Aurelio Aguirre de Conxo tamén seguirá co horario e actividades previstas tanto o sábado como o domingo.
COMERCIO
Os Bonos Corazón Concheiros xeraron un ingreso de máis de 200.000 euros nos establecementos da zona
A poucos días de finalizar o prazo para facer uso dos Bonos Corazón Concheros, o alcalde de Santiago, Xosé Sánchez Bugallo, adiantou esta mañá en rolda de prensa que o importe total de gasto propiciado por esta campaña vén de acadar os 200.063 euros, dos que 153.423 euros foron consumidos en establecementos comerciais, e 46.340 euros, nos locais de hostalaría. Prevese o lanzamento de dúas novas convocatorias dos Bonos Corazón en xuño e setembro deste ano, a primeira delas centrada na Praza de Abastos.
FESTAS
Volve a Festa dos Maiores o vindeiro 28 de maio
Tras dous anos de parón por mor da pandemia, o Recinto Ferial de Amio acollerá de novo a Festa dos Maiores o vindeiro sábado 28 de maio, dentro do programa das festas da Ascensión. Recupérase así un evento con gran tradición na cidade, e que permitirá á terceira idade compostelá desfrutar de novo dun xantar colectivo, seguido de actuacións musicais e bailes. As entradas, que teñen un custo de 7,50 euros, poden mercarse no Teatro Principal ata o 27 e maio.
BARRIOS E OBRAS
A memoria de obras do Concello correspondente a 2021 recolle 53 actuacións na zona urbana, cun investimento de máis de 14 millóns de euros
O concelleiro de Obras, Javier Fernández, presentou hoxe a memoria do departamento correspondente ao ano 2021, que recolle, un total de 53 actuacións na zona urbana, cun investimento de 14.022.199,97. Trinta están finalizadas, dezasete en execución e seis en licitación. Segundo sinalou Fernández, o obxectivo desta publicación é, "nun exercicio de transparencia", informar á cidadanía das actuacións realizadas polo Concello de Santiago o ano pasado.
IGUALDADE
A campaña Oes, ti de Compostela Territorio das Mulleres recorda que só o sexo en liberdade é sexo
Compostela, Territorio das Mulleres publica hoxe o vídeo da campaña "Oes, ti" de prevención da violencia sexual, dirixida á educación en masculino, no que a concelleira de Igualdade, Mercedes Rosón, e varias das persoas responsables das entidades adheridas ao programa municipal de igualdade expresan a cámara unha serie de mensaxes claras e concisas sobre o consentimento e a liberdade sexual das mulleres.
ALCALDÍA
O Maker Faire Galicia 2022 presentará un programa híbrido na súa oitava edición, que terá lugar entre o 1 ao 5 de xuño
O alcalde de Santiago, Xosé S. Bugallo, acompañado por Marcos Saavedra, director da feira; Ana Sánchez, directora de APD Noroeste; e Ana Isabel Vázquez Reboredo, directora-xerente da Cidade da Cultura, presentou esta mañá no Pazo de Raxoi a 8ª edición da Maker Faire Galicia, o evento deste tipo máis grande da península, que tras dous anos en formato 100% en liña debido á pandemia, retoma con forza a presencialidade.
MERCADOS
O Recinto Feiral de Amio acolle de xoves a domingo a novena edición do Salón do Vehículo de Ocasión
O concelleiro de Mobilidade e Seguridade Cidadá, Gonzalo Muíños, e o responsable da organización do evento, Fabián Saavedra, presentaron esta mañá en rolda de prensa a novena edición do Salón do Vehículo de Ocasión en Santiago, que se celebra no Recinto Feiral de Amio do xoves 19 ao domingo 22 de maio. Acompañounos a responsable do recinto, Belén Montero.
XUNTA DE GOBERNO
A Xunta de Goberno Local aproba a apertura do procedemento de adxudicación do servizo de limpeza en edificios e instalacións municipais para os próximos tres anos
A Xunta de Goberno Local aprobou a apertura do procedemento de adxudicación do servizo de limpeza en edificios e instalacións dependentes do Concello de Santiago de Compostela, por un importe base de licitación de 4.864.061,76 euros, IVE engadido, e un periodo de tres anos. Dos acordos adoptados informou en rolda de prensa o alcalde de Santiago, Xosé Sánchez Bugallo.
MOBILIDADE
O próximo 19 de maio terá lugar un simulacro de sinistro no túnel de Cornes-Hórreo
O Concello de Santiago en colaboración co Ministerio de Transportes, Movilidad y Agenda Urbana (MITMA) vai levar a cabo un simulacro de actuación e coordinación entre todos os servizos implicados (emerxencias, bombeiros, sanitarios, policía local, xestores do túnel, protección civil...) ante un sinistro que implicaría a extinción dun incendio e a evacuación de feridos e de usuarios do túnel de Cornes-Horreo na SC-20, que une o Polígono do Tambre co Milladoiro.
ALCALDÍA
Amplíase o espazo para a instalación de "foodtrucks" á zona da Carballeira do Banquete de Conxo durante a Festa
As persoas interesadas en instalar postos de foodtruck no espazo cedido polo Sergas na zona de aparcamento da rúa Ramón Baltar e na Carballeira do Banquete o vindeiro 22 de maio, co gallo da celebración da III Festa do Banquete de Conxo, poderán solicitar ata o 18 de maio as autorizacións correspondentes para a ocupación da vía pública. O espazos habilitados poderá acoller un máximo de vinte postos, que serán autorizados respectando a orde de presentación no rexistro.
