Noticias

A concelleira de Deportes, Esther Pedrosa, presentou este xoves o Campionato Galego de Karate Sénior, Para-Kárate e Máster, que se celebrará este vindeiro domingo no Polideportivo Municipal de Santa Isabel, organizado pola Federación Galega de Karate e Disciplinas Asociadas e promovido polo Concello.

O concelleiro de Relacións Institucionais, Sindo Guinarte, recibiu a Alfredo Okenve, Premio franco-alemán de Dereitos Humanos e Estado de Dereito no ano 2018. No acto tamén participaron a primeira tenente de alcalde, Mercedes Rosón; o edil popular José Antonio Constenla; a concelleira de Compostela Aberta Branca Novoneyra e a voceira do BNG, Goretti Sanmartín.

O Pleno aprobou na súa sesión deste xoves varias declaracións institucionais aprobadas por unanimidade, entre elas unha de rexeitamento do desenvolvemento da planta de valoración de residuos da construción e demolición de Miramontes, outra para facer fronte á emerxencia climática e unha máis para investigar e divulgar o labor do Grupo Nós.

Un ano máis, o Apalpador chegará dende O Courel para saudar as crianzas de Compostela. A ruada do Apalpador, organizada pola Asociación Semente Compostela coa colaboración do Concello, sairá mañá venres, a partir das 18:00 horas, do local da Asociación Gentalha do Pichel na rúa de Santa Clara.

Nas primeiras dúas semanas de apertura, o belén tradicional da igrexa de San Fiz de Solovio rexistrou a visita de 8.985 persoas, cunha media de 691 por día. Os picos de asistencia ocorreron durante a Ponte da Constitución, cando en só tres días acudiron ao templo compostelán 4.030 persoas.

A Concellaría de Educación vén de publicar a relación de admitidos/as e excluídos/as no Programa Municipal de Conciliación de Nadal, que se desenvolverá os días 23, 24, 26, 27, 30 e 31 de decembro de 2019 e o 2, 3 e 7 de xaneiro de 2020 no CEIP Monte dos Postes e no CEIP Ramón Cabanillas. As relacións poden consultarse nos documentos adxuntos.

O Pleno da Corporación aprobou este xoves a suspensión cautelar do procedemento de autorización de usos de aloxamento temporal. Esta medida cautelar adóptase mentres se tramita unha modificación do Plan Xeral de Ordenación Municipal (PXOM) para regular esta materia. A suspensión saíu adiante cos votos favorables de PSdeG-PSOE, Compostela Aberta e BNG e coa abstención do PP.

A concelleira de Acción Cultural, Mercedes Rosón, presentou este mércores o programa Hildegarda, que se desenvolverá do venres ao domingo baixo o lema "As mulleres na tradición cristiá. Xornadas para un diálogo feminista". Trátase dunha iniciativa da compañía A Feroz, en representación da cal estiveron na rolda de prensa Inés Salvado e Lorena Conde.

A Banda Municipal de Música de Santiago súmase á programación de Nadal con dous concertos, un este sábado 21 de decembro, ás 21:00 horas, na igrexa de San Francisco, e outro o sábado 4 de xaneiro, ás 20:30 horas, no Teatro Principal. En ambos os dous concertos, a Banda estará acompañada da Escolanía e do Coro Cardeal Quiroga, da Catedral de Santiago, para interpretar un repertorio propio destas datas de Nadal.

O concelleiro de Barrios, Javier Fernández, presentou este mércores a Festa de Nadal do Barrio Xardín. Inicialmente, o evento ía celebrarse este sábado 21 de decembro, pero ante as previsións meteorolóxicas, a organización decidiu aprazala ata o sábado 28, co mesmo calendario de actividades previsto. Xunto ao edil estiveron na rolda de prensa, en representación do colectivo, Lola Puerta e Guillermo Caldera.