Noticias

Baixo o título Unha ollada ao pasado, o Consorcio de Santiago, en colaboración co Museo do Pobo Galego, promove unha exposición de postais antigas da cidade do coleccionista compostelán Uxío de la Riva Pol. A mostra exhíbese dende este mércores na Casa do Cabido, na praza das Praterías, onde foi presentada. Ao acto asistiron o alcalde de Santiago, Martiño Noriega; a xerente do Consorcio, Belén Hernández; membros do Padroado do Museo do Pobo Galego; e o comisario da exposición, Juan Conde.

Escuro á vez que brillante, fascinante, obsesivo e amante da mellor literatura, Arturo Ripstein consolidou ao longo de 50 anos unha das carreiras máis persoais e viscerais do cinema a nivel internacional. Este xoves, Cineuropa entregaralle o seu premio ao cineasta mexicano, que está en Santiago revisitando o seu cinema. Á parte de Profundo Carmesí, tras a entrega do galardón, poderemos ver El lugar sin límites, outro filme da súa retrospectiva, ás 17:00 h no Salón Teatro.

O concelleiro de Medio Ambiente e Convivencia presentou este martes o resultado do estudo de puntos conflitivos en períodos de fortes choivas, que lle fora encargado a Viaqua despois do temporal que causara importantes asolagamentos a comezos de outubro. O informe foi elaborado en colaboración coa Policía Local e os Bombeiros e, segundo explicou Xan Duro, desvela a existencia de problemas estruturais en toda a cidade e de deficiencias na execución de determinadas obras, que favorecen que se produzan inundacións en caso de fortes chuvias. Só en dous...

Ás 20:00 h deste mércores, un Teatro Principal cheo ata a bandeira recibirá ao director Aitor Rei na estrea da súa moi esperada Frankenstein-04155, película documental que analiza as múltiples variables que influíron no fatal accidente do Alvia 04155 o 24 de xullo de 2013. Producida por Boneca Lareta, conta coa colaboración da Plataforma de Vítimas Alvia 04155 e recibiu financiamento a través de achegas de particulares mediante unha plataforma de crowdfunding. Unha estrea ineludible.

Turismo de Santiago, a través do seu servizo para a promoción da cidade como destino de Congresos, Xornadas e Incentivos, o Santiago de Compostela Convention Bureau, participa na IBTM World, a feira máis importante do sector congresual no mercado español, que se celebra en Barcelona entre o 17 e 19 de novembro.

O alcalde de Santiago informou hoxe da renuncia de Serunión a ser a adxudicataria dos comedores escolares nos cursos 2015-2016. A decisión desta empresa, que actualmente presta o servizo, chega despois de que tamén renunciaran ao contrato a malagueña Perea Rojas (que fora a máis valorada na mesa de contratación e que perdeu recentemente os contratos que tiña coa Xunta por non garantir a calidade do servizo); e a compostelá Ruta Xacobea (segunda clasificada no procedemento).

A Real Filharmonía de Galicia celebra esta semana dous concertos no Auditorio de Galicia. O primeiro será o xoves 19, ás 21:00 horas. Ao día seguinte, o venres, a orquestra ofrecerá un concerto didáctico para escolares, ás 11:00 horas. En ambas citas levará a batuta o director titular e artístico da agrupación, o mestre Paul Daniel.

A praza do Obradoiro acolleu unha concentración para condenar os últimos asasinatos machistas, que deixaron tres vítimas no Estado nos últimos días.

O alcalde de Santiago, Martiño Noriega, sumouse á concentración convocada pola Universidade de Santiago en repulsa aos atentados acontecidos o pasado venres en París.

Con motivo da celebración do Día do Neno, o Concello acollerá este 20 de novembro un pleno infantil, no que participarán 25 alumnos e alumnas de catro colexios composteláns. Ademais, haberá unha xincana, un obradoiro informativo, un obradoiro creativo de TV e actividades de reforzo dos dereitos básicos da infancia.