Noticias

Este venres 6 de novembro, a Banda Municipal de Música de Santiago abandona puntualmente a súa tempada sinfónica para unha nova e innovadora cita, un concerto cheo de ritmo e espectacularidade que levará por título Bailes de salón. Será no Centro Sociocultural de Vite, ás 11:30 horas.

Nova proposta de viaxe no marco do programa Imos de excursión, promovido pola Concellaría de Acción Cultural. Nesta ocasión, os participantes achegaranse ao Madrid histórico durante a ponte festiva do 6 ao 8 de decembro.

Este sábado, 7 de novembro, cita dobre co programa Imos ao baile, con sesións na Casa das Asociacións de Cornes e no Local Sociocultural de Santa Cristina de Fecha ás 17:30 horas.

O alcalde de Santiago, Martiño Noriega, presidiu no Salón Nobre do Pazo de Raxoi o acto de entrega do VIII Premio Internacional Compostela de Álbums Ilustrados, que recaeu en Miguel Cerro Circo, pola obra Después de la lluvia. Nesta edición do certame participaron 339 álbums ilustrados procedentes de 20 países.

O alcalde de Santiago, Martiño Noriega, recibiu esta tarde a Asociación en Defensa da Sanidade Pública nun encontro que cualificou como "cordial e no que se acordou reactivar o Consello de Saúde Municipal".

A Concellaría de Acción Cultural, en colaboración coa Unión de Consumidores de Galicia e co patrocinio do Instituto Galego de Consumo, organiza neste mes de novembro catro talleres formativos noutros tantos locais socioculturais: Figueiras, Marantes, Marrozos e A Peregrina. A temática será a comprensión da factura da electricidade e as prácticas para aforrar na mesma.

O certame Santiago(é)Tapas volverá dinamizar a gastronomía da capital de Galicia entre o 12 e o 29 de novembro, con máis de 65 establecementos participantes nun evento que chega á súa oitava edición. Xa se está a celebrar a fase de preselección, que determinará o número total de concursantes. Un xurado é o encargado de asegurar a calidade e máis a adecuación aos criterios do evento dos petiscos presentados

A concelleira de Economía e Facenda, María Rozas, afirmou na rolda de prensa posterior á Comisión de Facenda que a proposta do Goberno municipal para a aprobación das ordenanzas pasa por "gravar máis a quen máis ten", o que implicaría incrementar o tipo para o 10% das propiedades non residenciais máis caras. Para María Rozas, trátase de "xustiza social, de que máis ten aporte máis para poder cumprir o obxectivo de duplicar o gasto social a 100 euros por habitante e ano".

O Goberno local quere elaborar un novo Plan de Mobilidade Sostible, e aspira a que ese documento goce dun consenso social que non tiveron ata agora documentos semellantes, de xeito que se garanta a súa aplicación a longo prazo. Para iso, o primeiro paso será asinar un gran Pacto pola Mobilidade. Os traballos para logralo comezarán o próximo día 10 de novembro, cunha xuntanza na que participarán diferentes axentes sociais de Compostela e representantes dos municipios da comarca.

A concelleira de Políticas Sociais, Concha Fernández, recibiu no Pazo de Raxoi o Foro Galego da Inmigración, cos que falou sobre unha moción a levar ao próximo Pleno sobre os centros de internamento de estranxeiros (CIE). O obxectivo pasa agora por reunirse co resto de grupos políticos para elaborar unha declaración conxunta que poida ser aprobada pola Corporación. Na moción quere manifestarse o compromiso do Concello en traballar pola erradicación do racismo na cidade e pola igualdade de dereitos e oportunidades para toda...