COMERCIO
Entregadas as bandas aos gañadores da edición de verán do Concurso de Escaparatismo
O concelleiro de Promoción Económica, Emprego, Comercio e Turismo, Xosé Manuel Iglesias, entregou as bandas de escaparatismo aos tres premiados na edición de verán do VI Concurso Municipal de Escaparatismo SCQ Shopping: a tenda de doces Pecados de Compostela, Óptica Pontecastro e Sistemas de Seguridade A-1. O obxectivo do certame, dirixido a todos os comercios da cidade, é contribuir á dinamización e mellora dos estabelecementos en activo, incentivando a súa capacidade creativa e a súa imaxe.
TURISMO
Os "Chaquetas Vermellas" regresan ás rúas
Turismo de Santiago, co obxectivo de prestar un servizo de información turística máis áxil e eficaz, pon en funcionamento un ano máis a un grupo de voluntarios, denominado "Chaquetas Vermellas" polo seu vistoso uniforme. Estará en funcionamento entre o 20 de xullo e o 31 de agosto, na temporada alta turística.
