Noticias

A Concellaría de Promoción Económica, Emprego, Comercio e Turismo ofrece asesoramento personalizado ás empresas e persoas que se presenten ás dúas convocatorias do programa Compostela Activa 2009: Axudas para a creación de novas empresas e Concurso de novas ideas empresariais. Faino a través do SAE, o Servizo de Apoio á Empresa, un servizo integral e gratuíto de apoio ás persoas emprendedoras, á empresa e ao comercio de Compostela, que no que vai de 2009 leva atendidas máis de 100 consultas.

A Concellería de Xuventude preparou para mañá sábado, 18 de xullo, dúas actividades: dous torneos de xogos de rol e unha xornada de sensibilización sobre o voluntariado. As competicións de rol, cos xogos Lenda dos 5 aneis e Flames of war, celebrase no Centro Sociocultural e Xuvenil Municipal do Ensanche de 9:00 a 14:00 e de 16:00 a 21:30 horas. A actividade de sensibilización terá lugar na Praza Roxa, de 11:30 a 14:00 horas.

Dentro do programa de verán da Casa das Asociacións organizado pola Concellería de Participación Cidadá, inaugurouse a exposición de óleos do artista portugués José Monteira, a través dos que ofrece a súa particular visión de Compostela. A mostra estará aberta ata o 14 de agosto.

Como Cristiano Ronaldo. Así apareceu Rober Bodegas nos balcóns do pazo de Raxoi para dar o pregón das Festas do Apóstolo ante o numeroso público que encheu a praza do Obradoiro. O monologuista de Carballo botou man da actualidade e dos referentes históricos de Compostela para dirixirse a un público que logo puido asistir de balde ao concerto de Nuria Fergó.

A igrexa da Universidade acolle ata o 30 de agosto a exposición Chaplin en imaxes, que ofrece unha visión global da obra do xenial artista dende varios puntos de vista. Ao redor desta mostra realizaranse varios talleres didácticos para nenos promovidos pola Concellería de Educación en colaboración coa Universidade de Santiago e a Fundación "la Caixa".

O alcalde compostelán, Xosé A. Sánchez Bugallo, referiuse na súa rolda de prensa semanal ás informacións sobre o reparto de fondos que a Xunta prevé realizar para a promoción das liñas de baixo custo nos aeroportos galegos. Así, manifestou que "non poderemos dar por boas solucións que impliquen un enorme paso atrás".

Ata o 31 de xullo continúa aberta a Escola de Verán de Inglés no IES Rosalía de Castro. Dentro das diversas actividades que se realizan no marco deste programa, un grupo de alumnos realizou unha visita ao Concello.

As Festas do Apóstolo comezan o venres 17 coa lectura do pregón, que correrá a cargo do humorista galego Rober Bodegas. É coñecido pola súa participación no programa de TVE El Rey de la Comedia, e actualmente colabora no magacine de La Sexta Sé lo que hicisteis...

A Granxa Escola da Fervenza do Toxa, en Silleda, acollerá do 17 ao 26 de agosto a edición 2009 de AnimaLingua, actividade organizada pola Concellería de Normalización Lingüística. Ata 30 nenos e nenas de entre 8 e 11 anos poderán participar neste campamento de verán, co obxectivo de que se expresen en galego ao tempo que coñecen o funcionamento dunha granxa ou se inician nas tarefas propias dunha hora ou dun invernadoiro. As inscricións realizaranse do 15 ao 24 de xullo no Rexistro Xeral do Concello.

Pecados de Compostela, Óptica Pontecastro e Sistemas de Seguridade A-1 obtiveron, respectivamente, o primeiro, segundo e terceiro premio da edición de verán do Concurso de Escaparatismo SCQ Shopping. O obxectivo deste certame é contribuír á dinamización e mellora dos estabelecementos en activo, incentivando a súa capacidade creativa e a súa imaxe.