Noticias

A Concellaría de Benestar Animal vén de instalar uns sinais para pedirlles precaución aos condutores en zonas nas que é frecuente o paso de animais, máis en concreto de gatos e de parrulos. Estes novos elementos foron colocados en puntos da cidade nos que existen colonias felinas, e tamén no contorno do Auditorio de Galicia.

Esta mañá comezaron as obras da fase III de Vista Alegre, que permitirán rebaixar as cotas da calzada nas rúas Bispo Diego Peláez e Santa Comba. Tal e como adiantara o concelleiro de Espazos Cidadáns, os traballos vanse desenvolver de forma simultánea, con dous equipos de obra diferentes.

A Xunta de Goberno aprobou hoxe os prezos públicos dos servizos de comedor e de madrugadores na Rede de Centros Públicos de Educación Infantil e Primaria, para o curso 2016-2017. O prezo que deberán pagar os usuarios polo xantar queda fixado en 4,50 euros, IVE engadido, mentres que o do almorzo será de 1,93 euros, tamén con IVE engadido.

O concelleiro de Espazos Cidadáns, Dereito á Vivenda e Mobilidade deu conta hoxe do inicio da fase III das obras de mellora da mobilidade e accesibilidade de Vista Alegre. Os traballos arrancarán o próximo luns, e tal e como explicou Jorge Duarte, executaranse con dous equipos distintos e de xeito simultáneo nas rúas Bispo Diego Peláez e Santa Comba.

A Xunta de Goberno acordou hoxe abrir o procedemento de obras de reparación e mantemento en diversas instalacións dependentes do Concello de Santiago, ás que se destinarán un total de 630.680 euros, IVE incluído. Desa cifra, a maior partida será para o Departamento de Educación, que disporá de 400.000 euros para actuacións de mellora nas dependencias da súa responsabilidade.

A praza do Obradoiro acolleu unha concentración para condenar o último asasinato machista, que deixou unha vítima en Torrevieja (Alicante).

O concelleiro de Medio Ambiente e Convivencia participou hoxe en Melide no acto de sinatura do convenio de colaboración entre a Vicepresidencia da Xunta e sete Agrupacións de Protección Civil dos concellos do Camiño Francés. Xan Duro subscribiu en nome do Concello de Santiago ese acordo, que ten como obxectivo promover a colaboración en materia de prevención de riscos, información sobre seguridade e socorro aos peregrinos e peregrinas que se dirixen a Compostela.

O Goberno local vén de manifestar a súa satisfacción despois de que o Tribunal Superior de Xustiza de Galicia reclamara a creación do cuarto xulgado do Social de Santiago. O alto tribunal galego incluíu esta demanda na súa memoria relativa a 2015, na que solicita seis novas salas para toda Galicia, unha delas a de Compostela. A súa creación xa fora reivindicada tamén polo Concello de Santiago, a través dunha declaración institucional aprobada no pleno ordinario do pasado mes de novembro.

A concelleira de Igualdade, Desenvolvemento Económico e Turismo, Marta Lois, achegouse este mediodía ao mercadiño de Salgueiriños, para coñecer de primeira man a marcha do programa Efecto Proximidade. As actividades retornaron hoxe ao mercado, e repetirán os xoves 25 de agosto e 1 de setembro. O obxectivo, segundo lembrou a edil, é "dinamizar o mercadiño de Salgueiriños, a través de elementos lúdicos, artísticos, formativos e gastronómicos". Do seu desenvolvemento encárgase...

As rúas de Santiago serán escenario o próximo domingo da terceira das Marchas Ciclistas Unificadas de Galicia, que organiza Special Olympics. A proba foi presentada en rolda de prensa polo concelleiro de Deporte, Rafael Peña; a xerente de Special Olympics Galicia, Eunice Mosquera; e un dos deportistas que vai participar na proba, Jesús Cabo.