Noticias

O número 15 da revista Compostelánea xa está nas rúas. Dende o pasado domingo, é posible facerse cunha nova entrega deste caderno turístico e cultural de Compostela na súa versión en papel ou dixital. Compostelánea naceu en xullo de 2016, froito da colaboración entre as concellarías de Acción Cultural e de Turismo, co albo de ofrecer mensualmente unha guía práctica coa que residentes e visitantes puidesen participar na programación cultural e de ocio de Santiago.

A cidade ecuatoriana de Quito está a traballar no plan de xestión do seu centro histórico e, en colaboración coa Axencia Española de Cooperación Internacional para o Desenvolvemento (AECID), elixiron a cidade de Santiago como un dos modelos de referencia que van servir para o seu deseño e implantación. Vencellado a esta iniciativa, un equipo de expertos de Santiago desprazarase a Quito entre os días 7 e 14 de outubro para participar nun programa de asesoramento e explicar ademais o modelo do Consorcio de Santiago.

O concelleiro de Medio Ambiente, Xan Duro, xunto con Miguel Pardellas, do Grupo de Investigación de Pedagoxía Social e Educación Ambiental da USC, presentaron a nova fase do programa Descarboniza! Que non é pouco. Esta iniciativa, que pretende sensibilizar á veciñanza sobre os efectos dos gases invernadoiro e as emisións que os provocan, suma agora outros tres centros socioculturais.

A concelleira de Igualdade, Desenvolvemento Económico e Turismo, Marta Lois, e o catedrático de Economía Aplicada da Universidade de Santiago, presentaron no Pazo de Raxoi as principais liñas dun estudo sobre a implantación da Taxa Turística en Santiago. Este estudo será presentado ao sector en detalle na próxima reunión do Consello Municipal de Turismo, que terá lugar o vindeiro 9 de outubro.

Este venres 6, os orzamentos participativos Compostela Decide achegaranse á praza Roxa para que a cidadanía poida consultar de xeito presencial as propostas finalistas e votalas co apoio do equipo técnico. Haberá unha zona de xogo para a xente miúda -e non tan miúda- con mesas para debuxar, recortar e imaxinar "como queres que sexa o teu barrio", así como xogos de construción.

Despois do parón do verán, o Goberno local retoma os "Encontros ao vivo" para render contas diante da cidadanía e para recoller as súas queixas e suxestións. Será cunha xuntanza cos veciños e veciños da área Rural Leste do municipio, que engloba as parroquias de Marrozos, Aríns, Angrois e O Eixo. O encontro será o sábado, a partir das 11:30 horas, no CSC de Marrozos.

A praza do Obradoiro acolleu un minuto de silencio para condenar os últimos asasinatos machistas, que deixaron estes días vítimas en Barcelona e Vitoria.

A concelleira de Mocidade, Noa Morales, e o actor e director teatral Artur Trillo presentaron o novo calendario e formato do programa Compostela en Escena, incluido nas actividades deste trimestre do Centro Xove da Almáciga. Dende hoxe mesmo e ata o día 11 estará aberto o prazo de inscrición para as tres modalidades do programa: teatro, canto e danza.

O concelleiro de Educación e Cidadanía, Manuel Dios, asistiu hoxe ao acto de colocación dunha placa na honra do botánico e meteorólogo Baltasar Merino, no centenario do seu pasamento, con motivo do Día da Ciencia en Galicia. O acto, organizado pola Real Academia Galega das Ciencias en colaboración co Departamento municipal, tivo lugar no Parque das Ciencias "Isidro Parga Pondal" (San Roque).

A décimo cuarta edición de Curtocircuíto dedicará esta semana unha retrospectiva ao director francés F.J Ossang, un artista underground, incapaz de limitar a súa creatividade a unha soa disciplina, cun estilo inconfundible que combina punk, situacionismo, film noir e ficción post-apocalíptica. Cineasta de actualidade, galardonado co premio á Mellor Dirección na pasada edición do Festival Internacional de Cine de Locarno, foi definido por Joe Strummer (The Clash) como "o único director co que...