Noticias

A aula do Parque de Bombeiros de Santiago acolle ata o xoves 12 un Curso Básico de Intervencións de Extinción de Incendios en Patrimonio Histórico, organizado polo Grupo de Cidades Patrimonio da Humanidade de España. Estas sesións completaranse na última xornada cun simulacro de incendio.

O grupo de traballo composto por Xavier López García e Secundino García Mera, do CEIP Mosteiro de Caaveiro, do concello da Capela, fíxose co primeiro premio dos VII Premios Educacompostela. Este proxecto pedagóxico en torno aos xogos tradicionais logrou imporse nunha edición á que se presentaron 25 traballos.

O concelleiro de Xuventude, Xosé Baqueiro, presentou o programa de actividades formativas do departamento para os meses de novembro e decembro. Coincidindo co inicio do novo curso, Baqueiro indicou que se desenvolverá un primeiro paquete de actividades para dar continuidade á proposta cultural e educativa de todo o ano, resultado da colaboración entre profesionais e colectivos, que dará acollida a mozos e mozas con diferentes motivacións.

A Xunta de Goberno adxudicou provisionalmente as obras de reurbanización da rúa do Espírito Santo, por importe de 419.109 euros máis IVE. Entre outros asuntos, o Goberno local tamén deu o visto bo ao Plan municipal de prevención e defensa contra os incendios forestais.

Dende o mércores 11 de novembro e polo prazo de 10 días hábiles, estará aberto o prazo para solicitar composteiros de uso domiciliario. As persoas interesadas poden presentar a súa solicitude no Rexistro Xeral do Concello de Santiago, situado na rúa Presidente Salvador Allende, nº 4 baixo), de luns a sábado, en horario de 9.00 a 14.00 horas.

Un total de 86 produtos, pertencentes a 16 estabelecementos comerciais, presentouse ao II Concurso catálogo de promoción comercial de Compostela Regalar custa pouco, organizado pola Concellaría de Promoción Económica, Emprego, Comercio e Turismo. Á primeira edición, celebrada en 2008, presentáranse 51 produtos correspondentes a 14 comercios.

Do 9 ao 14 de novembro celébrase na Casa das Asociacións, en Cornes, a Semana da Ciencia, que nesta ocasión ten como tema A maxia da robótica. Entre as actividades previstas figura un obradoiro dedicado á robótica, unha exposición e un concurso sobre o tema.

O concelleiro de Promoción Económica, Emprego, Comercio e Turismo, Xosé Manuel Iglesias, entregou as bandas de escaparatismo aos tres premiados na edición de outono do VI Concurso Municipal de Escaparatismo SCQ Shopping: Katuxa Platero. Xoiaría de autor, a tenda de chocolates Xocoátel, e o estabelecemento de doces Pecados de Compostela.

A concelleira de Cultura e Centros Socioculturais, Socorro García Conde, e o director da Banda Municipal de Música, Xosé Carlos Seráns, presentaron a programación da Banda Municipal para esta temporada 2009/2010. Fixérono presentando tamén o folleto que recolle toda esta programación, así como unha pequena introducción histórica da Banda e o listado completo de músicos que a forman.

A concelleira de Cultura e Centros Socioculturais, Socorro García Conde, presentou no Auditorio de Galicia a ópera A Cincenta, do compositor italiano Gioachino Rossini. Encadrada nos Concertos Didácticos que ofrece o Auditorio, a obra está dirixida a escolares de 6 a 12 anos. Poderán gozar dela uns 6.000 nenos e nenas de toda Galicia.