Noticias

A concelleira de Medio Ambiente, Obras e Infraestruturas, María Castelao, visitou xunto con técnicos municipais e un representante da empresa que executou as obras en Lavacolla (Sabugueira), Munín (Laraño) e na parroquia de Cesar, nos que se acometeron tres obras de reforzo de firme financiadas pola Deputación da Coruña no marco do Plan de Obras e Servizos (POS 2010).

Un balcón situado na Fonte de Santo Antonio foi o gañador do III Concurso de Balcóns da Cidade Histórica "Flores na cidade". Este certame abrirase na súa seguinte edición a toda a cidade, segundo anunciou a concelleira de Medio Ambiente, María Castelao, na entrega de premios, na que tamén participou a concelleira de Cidade Histórica, María Pardo.

Minutos despois de coñecer a elección de Córdoba como sede da semifinal da Copa Davis, o alcalde compostelán, Xerardo Conde Roa felicitou á cidade andaluza, á súa Corporación e aos seus cidadáns. Do mesmo xeito agradeceu o "excelente traballo" realizado pola candidatura compostelá e manifestou que esta experiencia servirá de estímulo para futuras candidaturas de Santiago a organizar eventos deportivos internacionais.

Os concelleiros María Castelao e Adrián Varela fixeron balance das Festas do Apóstolo. Destacaron a "participación da cidade" nas distintas actividades do programa e a intención de seguir traballando nesta liña cara a futuras edicións, co obxectivo de converter as Festas nun "referente en Galicia".

O concelleiro de Cultura, Ángel Currás, presentou a programación do Festival dos Abrazos 2011 acompañado da xerente en funcións do Auditorio de Galicia, Silvia Modia. O festival, que celebra a súa cuarta edición, ofrecerá do 8 ao 27 de agosto, en espazos singulares da cidade, 66 actividades de diferentes disciplinas.

O alcalde, Xerardo Conde Roa, participou no acto de sinatura dos convenios de colaboración para o financiamento das Oficinas Municipais de Rehabilitación, xunto co conselleiro de Medio Ambiente, Territorio e Infraestruturas, Agustín Hernández. O rexedor compostelán interveu en nome dos 32 concellos asinantes.

A Cidade da Cultura estará unida coa propia cidade de Santiago a través dun servizo específico de transporte urbano, que nace con cinco frecuencias diarias en cada dirección. Este servizo xorde ante o crecente interese por visitar o complexo do Gaias e, en consecuencia, pola demanda tanto de veciños como de visitantes por unha conexión deste tipo.

Debido ao gran éxito de público, a Concellería de Centros Socioculturais decidiu prorrogar durante este mes de agosto o ciclo de cine Os clásicos á rúa, que se realizou de balde na praza de San Martiño Pinario todos os mércores de xullo.

A concelleira de Familia e Benestar Social, Paula Prado, recibiu o peregrino Lluís Carbonell na praza do Obradoiro. Chegou a Santiago despois de percorrer a pé 1.200 quilómetros dende a localidade catalá de Cerdanyola del Vallès (Barcelona), co obxectivo de dar esta enfermidade minoritaria, a causa da cal falecera súa nai.

O alcalde compostelán, Xerardo Conde Roa e o conselleiro de Medio Ambiente, Territorio e Infraestruturas, Agustín Hernández, mantiveron unha reunión en Raxoi, na que se analizaron as cuestións que o departamento autonómico ten en marcha na cidade de Santiago, coma o metro lixeiro, a variante de Aradas ou o saneamento e abastecemento, e outras nas que participa, como a conexión da Cidade da Cultura coa AP-9 ou a nova estación depuradora da Silvouta.