Noticias

A Catedral de Santiago acolleu un funeral institucional en memoria do ex presidente da Xunta Manuel Fraga. Unha ampla representación política e social acompañou a familia de Fraga neste acto.

Trinta nenos dos centros socioculturais de Conxo e Vite estiveron na pista de patinaxe de xeo da praza da Quintana, convidados pola Concellería de Centros Socioculturais.

Un circuíto no Monte do Gozo acollerá o domingo 29 de xaneiro o I Cross de Compostela, unha proba que aglutinará o Campionato Galego de Campo a Través nas categorías sénior e júnior e varias competicións para corredores en idade escolar.

O concelleiro de Medio Rural, Alumeado Público e Abastecemento e Saneamento, Luis García Bello, deu conta dalgunhas medidas de aforro enerxético no alumeado público postas en marcha polo Goberno municipal e doutras que se instaurarán en 2012. O obxectivo é que, ao 5% de aforro no consumo xa conseguido, se sume outro 12%.

A Banda Municipal de Música de Santiago de Compostela celebra o domingo 22 un novo concerto do ciclo de Novos Intérpretes, unha das novidades mais interesantes da programación 2011-2012. Este ciclo inclúe sete concertos nos que a Banda Municipal contará ao longo da tempada con sete solistas diferentes. Desta vez será Carlos Seráns Santos, que toca un instrumento pouco habitual no ámbito dos solistas, a tuba.

O alcalde compostelán, Xerardo Conde Roa, participou en Iria Flavia (Padrón) no acto de clausura do programa cultural polo XXV aniversario da constitución da Fundación Camilo José Cela. Á súa vez, conmemorábase o X aniversario do falecemento do escritor, producido o 17 de xaneiro de 2002.

O concelleiro de Mobilidade, Seguridade Cidadá e Tráfico, Albino Vázquez, deu conta dos datos da última enquisa sobre o nivel de satisfacción dos usuarios do transporte urbano. Os viaxeiros concédenlle unha nota global de 7,37 fronte ao 6,95 da enquisa do ano anterior, incrementándose a súa valoración de frecuencias e puntualidade.

O alcalde compostelán, Xerardo Conde Roa, presentou en Fitur a xornalistas e profesionais do sector un novo vídeo promocional co que Turismo de Santiago pretende promocionar a cidade nos mercados internacionais. O alcalde estivo acompañado pola concelleira de Turismo, Reyes Leis, quen presentou a nova guía profesional do Santiago de Compostela Convention Bureau, o servizo de Turismo de Santiago encargado da promoción da cidade como destino para a celebración de congresos, encontros, xornadas, etc.

A Unidade Móbil do Centro de Transfusións de Galicia que estivo no Obradoiro na mañá do martes 17 recolleu, un total de 21 doazóns de sangue. Esta cifra supón un incremento do 75% con respecto a última ocasión na que o CTG estivo cunha unidade móbil na praza do Obradoiro, en xaneiro de 2011.

A última Xunta de Goberno aprobou a apertura do proceso de contratación do novo servizo de dinamización da Rede de Centros Socioculturais. Este contrato, que terá carácter bianual (renovable por outros dous) suporá unha partida de 884.919 euros anuais, case 65.000 máis que en 2011, o que segundo o concelleiro de Participación Cidadá e Centros Socioculturais, Francisco Noya, "demostra o esforzo do Goberno municipal nesta materia e o compromiso cos veciños".