Noticias

Santiago de Compostela sumou nos once primeiros meses do ano un total de 1.130.857 pernotacións, segundo os datos feitos públicos polo Instituto Nacional de Estatística (INE). Neste período, a única cidade pertencente aos grupos das Cidades Patrimonio e da España Verde, compostos polos destinos comparables á nosa cidade, que supera o millón de pernotacións entre xaneiro e decembro, ademais de Santiago, foi Bilbao, con 1.027.764.

A campaña Nadal Solidario, organizada pola Concellería de Participación Cidadá, en colaboración co xornal gratuíto Santiagosiete, tivo como colofón unha gran gala no Teatro Principal.

O concelleiro de Turismo, Xose Manuel Iglesias, reuniuse co vicepresidente da Deputación da Coruña e responsable de Turismo, Pablo Villamar, e cos xerentes dos plans de dinamización turística de Ferrol-Ortegal, Costa da Morte e Terras do Ulla-Tambre, e empresarios do sector. O obxectivo deste encontro era establecer liñas de colaboración en materia de promoción turística.

Co Nadal chega de novo Todo Lírica, un proxecto creado hai nove anos pola Concellaría de Cultura e a Asociación Galega da Lírica, e que dende a súa primeira edición, baixo o nome de Festival de Zarzuela de Santiago, xa deu exitosos froitos artísticos e de público. O ciclo segue o formato de recitais de voz e piano das anteriores edicións e constará nesta singular ocasión, ás portas do Ano Santo 2010, con cinco concertos.

A Oficina da Cidade Histórica e Rehabilitación de Santiago recibiu 37 solicitudes para o mantemento de edificios na Cidade Histórica, unha vez pechado o prazo o 12 de decembro. Cómpre lembrar que en setembro, o Concello e o Consorcio de Santiago, dentro das súas políticas de recuperación urbana, iniciaron unha nova liña de axudas aos cidadáns para o mantemento de edificacións. Baixo o lema Ter é manter, púxose en marcha o "Programa de axudas ao mantemento da envolvente exterior e dos elementos...

Numeroso público achegouse ao Teatro Principal para asistir a Nadal de Danza’09, organizado pola Concellería de Educación en colaboración coa Asociación Cultural Danza Stellae. 116 alumnas e 1 alumno de diferentes idades de catro centros escolares composteláns amosaron no escenario as súas habilidades a través de variadas coreografías.

O Colexio Compañía de María acolleu o acto de entrega a este centro escolar da Medalla de Ouro ao Mérito Cidadá, outorgada polo Pleno municipal o 26 de novembro. A distinción premia o traballo realizado por esta institución ao longo de 250 anos de presenza en Santiago.

O alcalde compostelán, Xosé A. Sánchez Bugallo, inaugurou dúas citas tradicionais do Nadal en Compostela, Nadalxogo, no Multiusos do Sar, e a pista de xeo instalada no Recinto Feiral de Amio. A primeira das propostas estenderase ata o 27 de decembro, mentres que a pista de patinaxe estará aberta ata o 17 de xaneiro.

O concelleiro de Promoción Económica, Emprego, Comercio e Turismo, Xosé Manuel Iglesias, presentou os comercios gañadores da Edición de Nadal do VI Concurso Municipal de Escaparatismo SCQ Shopping. O primeiro clasificado foi a tenda de marroquinería Media Lúa; o segundo, o estabelecemento de decoración Andrómenas; e o terceiro, Floristería Lilas.

Unha vez aprobado pola Comisión Asesora do Casco Histórico o anteproxecto de rehabilitación da Casa do Cabildo, a intención do Concello é que as obras se realicen a partir do outono de 2010, co obxectivo de que estean rematadas cara o verán de 2011. Así o anunciou o alcalde compostelán, Xosé A. Sánchez Bugallo, na súa rolda de prensa semanal.