Noticias

No marco das actuacións que o Consorcio de Santiago leva a cabo no patrimonio do termo municipal, e moi estreitamente relacionado coa cidade histórica e os Camiños de Santiago, vaise intervir na igrexa de Santa María de Marrozos, situada na parroquia homónima. O organismo acaba de sacar a obra a concurso, por un orzamento global de 67.414,84 euros. As empresas interesadas deberán presentar as súas propostas ata o 28 de novembro.

O Ministerio de Fomento vén de entregarlle ao Goberno local o borrador dun convenio para o acondicionamento da rotonda de Conxo, que pasa porque o Concello asuma o mantemento da glorieta. Foi na xuntanza que o alcalde mantivo esta mañá en Madrid co secretario xeral de Infraestruturas, José Javier Izquierdo Ronsero.

A concelleira de Igualdade, Marta Lois, deu conta esta mañá das actividades e accións organizadas no marco da campaña En negro contra as violencias, deseñada polo Concello de Santiago co gallo do 25 de novembro, Día Internacional contra as Violencias Machistas.

O alcalde, Martiño Noriega, participou esta tarde en Madrid na comisión de seguimento da estación intermodal, presidida pola responsable de ADIF, Isabel Pardo de Vera. Á xuntanza tamén asistiu o concelleiro de Espazos Cidadáns, Dereito á Vivenda e Mobilidade, Jorge Duarte, así como representantes doutras administracións implicadas na infraestrutura, como a conselleira de Infraestruturas, Ethel Vázquez.

A Xunta de Goberno acordou hoxe declarar anulado o proxecto de urbanización do SUNP-38 de Formarís, aprobado en 2010, en virtude dunha sentenza ditada polo Xulgado Contencioso-Administrativo nº1 de Santiago. Esta é a segunda sentenza xudicial relativa a este solo, no que está prevista a construción da rotonda que enlazará o futuro orbital coa N-550.

Turismo de Santiago participa este ano por primeira vez na Global European Marketplace de Londres, un prestixioso punto de encontro de profesionais que se celebra este 2 de novembro. Neste evento participan 400 provedores europeos, que foron elixidos baixo a temática "European Lifestyle", e 350 grandes compradores turísticos globais, con gran presenza de compradores asiáticos e estadounidenses.

Os vindeiros 13 e 14 de novembro o Palacio de Congresos acolle o espazo aberto polo emprego Talentia 2018, ao abeiro do cal se organizan unhas xornadas que levan por nome Oportunidades para o talento e a creación do emprego nas economías locais. A concelleira de Emprego, Marta Lois, deu conta destas xornadas, acompañada polo técnico responsable da área, Xavier Ferreiro.

A Xunta de Goberno aprobou hoxe a resolución da convocatoria das axudas individuais para o uso do servizo de taxi como medio alternativo para as persoas con mobilidade reducida ou con dificultades para utilizar o transporte colectivo, coñecidas como "bonotaxi". Un total de 42 persoas beneficiaranse da convocatoria.

Os pequenos e pequenas teñen varias alternativas de lecer esta fin de semana da man dos programas Apego e 12 doces do outono, cunha sesión de contos e varias propostas teatrais e de títeres.