Noticias

Arizona Baby estará en Compostela para presentar o seu último traballo, The truth, the whole truth and nothing but the truth, que presentaron en outubro. Será o venres 1 de marzo, ás 21:00 horas, dentro do Compostela Rock, nun concerto no que estarán acompañados pola banda portuguesa a Jigsaw. As entradas (12 € máis gastos, anticipada e 15 € na billeteira) poden mercarse na billeteira do Teatro Principal, en salacapitol.com ou na Reixa Tenda.

En cumprimento da programación das Campañas e Operacións Especiais de vixilancia e control previstas para este ano 2013, a Policía Local está efectuando controis de transporte escolar durante esta semana.

O concelleiro Luis Bello deu conta das actuacións previstas neste 2013 nas parroquias rurais de Compostela, que suman un investimento de preto de 2 millóns de euros. Fíxoo nunha rolda de prensa na que lle deu o relevo a Francisco Noya, quen a partir de agora se fará cargo do "día a día" da xestión dos temas relacionados co medio rural e da relación cos seus veciños.

A Xunta de Goberno aprobou os prazos de admisión e matrícula nas escolas infantís municipais de Conxo, Fontiñas e Meixonfrío-Salgueiriños. Ademais, xa está dispoñible toda a documentación e información relativa á reserva, preinscrición e matrícula nas escolas infantís de San Roque, Tras Parlamento e Tambre, co-xestionadas co Consorcio Galego de Servizos de Igualdade e Benestar.

O Pleno da Corporación, na súa sesión ordinaria de febreiro, aprobou definitivamente e por unanimidade o Regulamento de Venda Ambulante. Tamén deu o visto bo, neste caso inicialmente, ao Plan de Emerxencias Municipal. Nesta sesión formalizouse a toma de posesión como concelleiro de Luís Meijide Rodríguez.

A concelleira de Turismo, Reyes Leis, asistiu no Concello de Padrón á sinatura do convenio coa Fundación Ruta Xacobea para poñer en valor a ruta xacobea Mar de Arousa e Ulla.

O concelleiro de Deportes, Adrián Varela, presentou a proba inaugural do Campionato de España de Enduro de motociclismo (IV Memorial Eulo Albert), que se disputará nos circuítos habilitados no Monte do Gozo e no Estadio de San Lázaro o sábado 2 e o domingo 3 de marzo. Máis de 200 pilotos participarán nesta competición, que Santiago acolle por primeira vez.

A concelleira de Comercio, Reyes Leis, acompañada da técnico responsable de Comercio, Lucía Castro, e de Roi Fernández, da empresa Mantelnor Servizos Especializados, presentaron no Pazo de Raxoi un avance do Censo de locais comerciais, que o Concello está elaborando para coñecer con precisión a situación dos locais comerciais, o seu número, as súas características, se están ocupados ou non e, nos casos nos que están sen ocupación, cales son as causas.

O alcalde compostelán, Ángel Currás, reuniuse co vicerreitor de Estudantes, Cultura e Formación da USC, Francisco R. Durán, e co catedrático director do programa A ponte entre o ensino medio e a USC, Luis Hervella.

O alcalde compostelán, Ángel Currás, recibiu o director da Real Filharmonía de Galicia, Paul Daniel, o día antes de que a formación ofreza o primeiro concerto baixo a súa dirección.