Noticias

A Xunta de Goberno, nunha sesión extraordinaria, adxudicou as obras de substitución das canalizacións de auga na travesía de Angrois, por un importe de 33.748 euros (IVE incluído).

A concelleira de Familia, Benestar Social, Muller e Emprego, Paula Prado, entregou os diplomas aos alumnos e alumnas participantes no Obradoiro de Familia e Saúde, realizado na Casa das Asociacións de Benestar Social no marco do Programa Municipal de Intervención Socioeducativa.

A concelleira de Medio Ambiente, Obras e Infraestruturas, María Castelao, anunciou a posta a disposición dos cidadáns de 50 novas hortas urbanas en Fontiñas. Estas superficies de cultivo sumaríanse ás dispoñibles en Belvís, aumentando case un 100% o número de hortas existentes na actualidade. Ademais, de haber demanda, o Concello contempla a posibilidade doutra área de hortas en Pontepedriña.

Ángel Currás ofreceu a súa primeira rolda de prensa como alcalde. Na mesma anunciou os primeiros cambios na estrutura do Goberno, que afectan fundamentalmente ás áreas que el mesmo tiña ata agora como concelleiro. Así, Cultura pasará a depender directamente de Alcaldía, mentres que os departamentos de Educación e de Normalización Lingüística serán asumidos pola nova concelleira Rebeca Domínguez.

O director xerente do auditorio de Galicia, José Víctor Carou, presentou un novo ciclo da Concellería de Cultura, Música de Cámara. Fíxoo acompañado de Ramón Llátser, Alfredo Varela e Beatriz López, músicos da Real Filharmonía de Galicia e compoñentes das formacións que poderemos ver no ciclo.

Teatro de la Abadía presenta no Teatro Principal Grooming, de Paco Bezerra, dirixida por José Luis Gómez e con Nausicaa Bonnín e Antonio de la Torre no elenco. Será o xoves 19 de abril, ás 21:00 horas, na que xa está consolidada como unha das citas máis importantes da programación de teatro da Concellería de Cultura.

O ata agora primeiro tenente de alcalde e concelleiro de Educación e Cultura, Ángel Currás, tomou posesión como novo alcalde nun pleno extraordinario celebrado en Raxoi, no que afirmou o seu compromiso coa cidade e coas dificultades do día a día dos seus veciños. Antes, Xerardo Conde Roa formalizara a súa renuncia como alcalde.

A Galería Sargadelos acolleu a xuntanza de presentación ao profesorado da XII Campaña Municipal de Animación á Lectura, organizada pola Concellería de Educación e Kalandraka Editora, en colaboración coa Galería Sargadelos. Participaron uns 100 profesores e educadores das escolas infantís e dos centros de educación infantil e primaria composteláns e da bisbarra.

Continúa en Compostela o ciclo Íntimo&Acústico e dentro del chega o vigués Abraham Boba. Dará un concerto o mércores 18, na Zona "C" de Bonaval, a partir das 22:30 horas. As entradas para este concerto, a 6 euros anticipada e 8 euros o propio día, poden mercarse na billeteira do Teatro Principal e tamén na da Zona "C". Íntimo&Acústico ofrece, despois deste concerto de Boba, os de Maika Makovski+Gentle Music Men, Mónica de Nut Trío, Abe Rábade Trío,...

Xerardo Conde Roa anunciou en rolda de prensa a súa dimisión como alcalde de Santiago de Compostela. Considera que "á vista da miña situación procesual, é o mellor para a miña familia, para o meu partido, para a cidade e para a institución". A dimisión formalizarase nun Pleno que será convocado de inmediato. Posteriormente, será elixido o novo alcalde, que segundo indicou, será Ángel Currás, tras así decidilo os concelleiros do Goberno local.