Noticias

O alcalde compostelán, Ángel Currás, e José Carlos, Josefina, Xulio e Rosa Mª Maside Medina, familiares de Carlos Maside, asinaron un convenio de colaboración para a cesión temporal de obras de arte do legado do artista. Esta colección consta de 21 cadros, que se exhibirán nunha serie de exposicións.

O barrio de Conxo organiza unha nova edición do seu tradicional San Xoán. A celebración terá lugar dende a tarde ata ben entrada a noite do 23 de xuño na praza do Centro Sociocultural Aurelio Aguirre. O calendario de actividades foi presentado en rolda de prensa pola concelleira Reyes Leis e membros da Coordinadora de Festas Tradicionais do Barrio de Conxo.

Os alumnos e alumnas no curso de perruquería equina e canina organizado pola Unidade Municipal de Atención a Drogodependencias (UMAD) remataron as súas prácticas no Refuxio de Bando con varios cans do recinto. Así colaboraron tamén coa actividade da protectora para facilitar a adopción dos animais. A concelleira Reyes Leis achegouse ata Bando para presenciar a actividade e entregar os seus diplomas aos alumnos.

Logo da inauguración da man de Resonet, esta fin de semana continúa a programación da novena edición do Via Stellae. Este sábado 21 poderemos escoitar ao contratenor José Hernández Pastor que, xunto a Manuel Minguillón, arquilaúde, e Calia Álvarez, viola de gamba, estarán ás 20:30 horas en San Fiz de Solovio co programa Il primo gran divo… Baldassare Ferri. O domingo estará Galicia Brass, que presenta Brass Cats… un novo ensemble de metais ás 18:30 horas no Hostal dos Reis...

A concelleira de Comercio, Reyes Leis, inaugurou o Paseo das Estrelas, no que figura o nome dos comercios premiados no programa Santiago Comercio de Cine. Sitúase na rúa Xeneral Pardiñas (tramo comprendido entre Montero Ríos e República do Salvador) e pon en valor estes establecementos nunha rúa moi transitada da cidade e con gran vocación comercial.

O Concello, a través da Unidade Municipal de Atención a Drogodependentes (UMAD) organiza, en colaboración coa Sala Capitol, un novo concerto sen alcohol. Será este venres 20 de xuño a partir das 21:00 horas e o protagonista será o rapeiro andaluz ToteKing.

O Mercado de Abastos de Santiago acolleu a presentación da Festa da Rapa das Bestas de Sabucedo, declarada Festa de Interese Turístico Internacional, que se celebrará entre o 3 e o 7 de xullo. A presentación supuxo tamén a inauguración dunha mostra sobre a Rapa das Bestas, que poderá visitarse gratuitamente no Mercado de Abastos ata o próximo 7 de xullo, de luns a sábado.

A Xunta de Goberno, na súa sesión ordinaria, autorizou a celebración dun total de cacharelas, a realizarse entre os días 21 e 23 de xuño, maioritariamente nesta última xornada, noite de San Xoán. Destas fogueiras, 62 son públicas e outras 205 privadas, das que 85 corresponden á cidade e 120 ao rural.

A organización de Tapéate Compostela agarda un último tirón nesta fin de semana, na que remata o concurso de tapas. O público ten ata o domingo a oportunidade de probar as tapas que ofrecen os trinta locais participantes nesta edición. Todas as tapas teñen un prezo de dous euros. E todas teñen que empregar como base produtos do Mercado de Abastos de Santiago.

O Concello de Santiago e a Xunta de Galicia organizan e promoven a novena edición do Festival Via Stellae, un certame esencial no verán compostelán que, a piques de cumprir os seus dez primeiros anos de vida, vén avalado por unha consolidada traxectoria e que sempre contou co respaldo do público e co recoñecemento da prensa especializada. O festival inaugúrase este venres 20, ás 20:30 horas, no Convento de Santa Clara, con Resonet. Nesta edición haberá 23 concertos, que se celebrarán ata o 15 de xullo.