Noticias

O humorista Goyo Jiménez presenta o seu novo espectáculo, Evoluzión, na nosa cidade dentro do ciclo Falabaratos que organiza o Concello de Santiago. Será en dúas funcións, este xoves e o venres, ás 21:00 e 20:00 horas, respectivamente, no Teatro Principal. Despois del, o programa para este 2014 complétase con Uri Sabat & Daniela Blume con No cambies nunca: solo esta vez; Faemino e Cansado, que presentan ¡Como en casa ni hablar!; e Leo Harlem+Sergio Olalla con #trendingtronching.

Imprescindibles no pop español de 2014, a banda Izal presenta en Santiago Agujeros de gusano, o seu segundo álbum, que colleitou numerosos éxitos de crítica e público. Será este xoves 25, a partir das 21:00 horas, na Sala Capitol e dentro de Compostela Rock, ciclo organizado polo Concello de Santiago. As entradas, a 17 euros anticipada e 20 o día do concerto, poden mercarse no despacho de billetes do Teatro Principal (aberto de martes a sábado de 18:00 a 21:00 h), en Ticketea, A Reixa Tenda e salacapitol.com.

O Consorcio de Santiago está a traballar na restauración, rehabilitación e posta en valor da antiga fábrica de curtidos de Pontepedriña de Arriba para a súa conversión en Centro Nacional de Formación de Referencia en Materia de Rehabilitación, único no territorio nacional. O centro está promovido pola Fundación Laboral da Construción, en colaboración co Consorcio de Santiago, e conta co apoio do Concello de Santiago, a Xunta de Galicia e o Ministerio de Fomento.

A concelleira de Cultura, María Antón, e o director de AGADIC, Jacobo Sutil, presentaron esta mañá a XIX edición do Festival Internacional de Títeres, Galicreques. Fixérono acompañados do director do festival, Jorge Rey, e do director-xerente do Auditorio de Galicia, José Víctor Carou. Esta edición do festival celebrarase do 27 de setembro ao 5 de outubro en diferentes espazos da cidade e contará coa presenza de 21 compañías chegadas de diversas partes do mundo. Títeres para nenos...

A concelleira de Servizos Sociais, María José Corral, acompañada pola responsable da Unidade Municipal de Atención ás Migracións (UAMI), Carmen Peñamaría, presentou A cociña do meu veciño, un programa de seis obradoiros prácticos de cociña internacional que se realizarán de setembro a decembro.

Compostela Gastronómica, I Festival da Cociña Galega, recibe este mércores 24 de setembro a Mario Sandoval, Premio Nacional de Gastronomía 2013. O chef madrileño estará na Aula Gastronómica do Mercado de Abastos, onde ofrecerá un relatorio para expoñer o seu punto de vista acerca da combinación entre tradición culinaria e innovación.

Entre xullo e agosto, os establecementos hoteleiros de Santiago sumaron 305.395 pernoctacións, segundo os datos do Instituto Nacional de Estatística (INE). É a mellor cifra de pernoctacións en Santiago dende o 2005, só superada polo Ano Santo 2010, cando a festividade xacobea permitiu que se alcanzase o récord histórico da cidade no verán. Esta cifra representa un crecemento acumulado nos dous meses de verán de 24.432 pernoctacións respecto o mesmo período do ano pasado, un 8,70% máis.

O coruñés Néstor Pardo será a primeira proposta do recen nomeado ciclo Blues Nite by 1906. O ciclo foi posto en marcha o ano pasado polo Concello de Santiago e agora muda o seu nome tras o acordo entre o Concello e 1906. Este mércores 24, presentarase a programación completa do ciclo para o que queda de ano nunha rolda de prensa e, xa pola noite, teremos a primeira das propostas, o concerto do coruñés Néstor Pardo.

A axenda cultural para este mércores 24 trae dúas propostas dentro do Bono de Teatro Galego. Ás 20:30 horas teremos na Zona C a estrea absoluta de Despois do Tranvía, dirixida por Carlos Neira e que poderemos ver de novo de xoves a venres. E ás 21:00 horas poderemos ver, en función única e no Teatro Principal, D.E.P., de Malasombra Producións.

Curtocircuíto, Festival Internacional de Curtametraxes, mostrará máis de 120 filmes entre o 6 e o 11 de outubro, a proxectarse no Teatro Principal e na Zona C. Baixo a xestión de Pela del Álamo, o Festival propón un novo modelo compacto, de calidade, e con vocación internacional.