FESTAS
Maceo Parker traerá o mellor funk á Quintana
A Praza da Quintana acollerá o 26 de xullo o único concerto en Galicia do saxofonista Maceo Parker. O prestixioso músico de Carolina do Norte vén acompañadao de toda a súa banda e promete un intenso e extenso concerto. En Santiago soarán os temas do seu último e décimo álbum en solitario, "School’s in!" e outros da súa ampla e refutada traxectoria.
DEPORTES
O Consello Municipal de Deportes incorpora novos membros
Na tarde do martes 27 celebrouse no Salón de Plenos do Concello unha xuntanza do Consello Municipal de Deportes. Entre outros puntos, aprobouse a incorporación de dous novos membros ao organismo en representación da Universidade de Santiago e da Dirección de Deportes da Xunta: Elías J. Torres Feijó, vicerreitor de Extensión Cultural, e Henrique Rodríguez Pantín, xefe provincial de Deportes da Consellería de Cultura e Deporte na Coruña, respectivamente.
CENTROS SOCIOCULTURAIS
A Bibliopiscina instaura a lectura e o lecer nas piscinas de Sar
Por terceiro ano, os Centros Socioculturais levan a súa Bibliopiscina ao complexo deportivo Fontes do Sar. Unha completa selección de libros, cómic, xogos e pasatempos para contribuír ao lecer dos composteláns que se acheguen ás piscinas durante o verán.
PROMOCIÓN ECONÓMICA E TURISMO
Nace unha nova guía do comercio e das tendencias da cidade
"SantiaGO!" é o título dunha nova publicación que pretende ser unha guía do comercio e do estilo de vida na cidade. A iniciativa foi posta en marcha por dúas emprendedoras, Rosa Rodríguez e Raquel Peláez, coa colaboración da Concellaría de Promoción Económica e co patrocinio de Turismo de Santiago.
FUNDACIÓN GRANELL
"Pensar en pedra": exposición de escultura ao aire libre na terraza do Pazo de Bendaña
O xoves 29 de xuño, ás 20:00 horas, inaugúrase a exposición colectiva Pensar en Pedra, que amosará o traballo escultórico do alumnado da Escola de Canteiros de Pontevedra. A mostra estará complementada pola obra fotográfica que, sobre o traballo da pedra en Galiza, foi realizado pola fotografa Conchi Rodríguez. As obras escultóricas poderanse contemplar no Pazo de Bendaña ata o 4 de setembro.
CIDADE
Santiago estará na VII Asamblea Xeral da Conferencia das Cidades do Arco Atlántico
A concelleira de Rehabilitación e Casco Histórico, Mercedes Rosón, asistirá ao encontro das cidades que conforman o Arco Atlántico, e que terá lugar no Casino de Figueira da Foz desde o xoves 29 de xuño ao sábado 1 de xullo.
TRANSPORTE
TUSSA instala dez novas marquesiñas no rural
Unha vez asinado o convenio que estabelece a posta en marcha do Plan de Transporte Comarcal de Santiago, unha das primeiras medidas será a instalación de dez novas marquesiñas na cidade. As localizacións elixidas están na estrada xeral das zonas de Santa Lucía, Roxos, Sigüeiro e Marantes.
BENESTAR SOCIAL
Constituído o Consello Municipal das Persoas Maiores
As persoas maiores de Compostela teñen xa un órgano no que manifestar as súas inquedanzas e propostas para mellorar as políticas municipais que lles afectan. Trátase do Consello Municipal de Persoas maiores, unha entidade consultiva que quedou constituída o luns 26 de xuño no Pazo de Raxoi.
PROMOCIÓN ECONÓMICA
Técnicos do Concello explicarán o desenvolvemento das obras previstas na Praza de Abastos
A Concellaría de Promoción Económica e Mercados repartiu na Praza de Abastos 250 folletos cos que convoca a todos os comerciantes a unha reunión na que técnicos do Concello e responsables da remodelación do recinto explicarán as características do novo proxecto de execución, que ten un orzamento de 5,4 millóns de euros. A asemblea aberta terá lugar o luns 3 de xullo, ás 19:00 horas, no Auditorio de Galicia.
URBANISMO
Colócase a primeira pedra do novo polígono residencial de Cornes
Cornes contará en breve con 243 novas vivendas libres, tralo inicio das obras de urbanización do Polígono 1 do Sup-2. Os traballos teñen un prazo de execución de nove meses e medio e o orzamento é de 3.140.471 euros. A primeira pedra deste novo espazo foi colocada polo alcalde compostelán, Xosé A. Sánchez Bugallo.