Noticias

O alcalde, Martiño Noriega, recibiu hoxe a Alfonso López, presidente do Club Atletismo Santiago e representante de todos os clubs da cidade desta disciplina deportiva que practican na cidade 900 atletas.

O concelleiro de Educación e Cidadanía, Manuel Dios, presentou hoxe os actos impulsados dende o seu departamento para a conmemoración do Día Escolar da Non Violencia e a Paz, o 30 de xaneiro. O edil estivo acompañado por Belén Álvarez, coordinadora das escolas infantís municipais; Adela Maroño, profesora de música do Colexio Pío XII e unha das autoras da guía didáctica de Brundibár; e Fernando Rey, director da Escola Municipal de Música.

O concelleiro de Medio Ambiente e Convivencia explicou hoxe que o Concello ten activado o protocolo de actuación fronte ás xeadas, ante as baixas temperaturas dos últimos días. Xan Duro explicou que nel colaboran a Policía Local, Protección Civil, e Urbaser.

A Concellaría de Educación e Cidadanía e Viaqua poñen en marcha varias propostas educativas para este curso 2016-2017, co obxectivo de lograr unha maior concienciación dos nenos e nenas sobre o uso responsable da auga e o coidado do medio ambiente. Destacan o programa Aquoloxía e as visitas didácticas á EDAR e á ETAP, que se suman á exposición H2Oh! Os segredos da auga da túa cidade, actualmente aberta na Alameda.

O alcalde, Martiño Noriega, presentou hoxe a "edición máis ambiciosa" das que se teñen celebrado ata o de agora do Santiautor. Foi nunha rolda de prensa na que participaron o director do festival, Suso Peón; o seu director artístico, Miguel Lueiro; e Rosa Cedrón, unha das artistas que participarán no Santiautor 2017. Entre o 3 de marzo e o 30 de maio, ao abeiro deste ciclo poderemos asistir a 32 concertos, tanto de artistas consolidados no panorama musical como de novas promesas.

A Real Filharmonía de Galicia ofrecerá dous concertos esta semana. O primeiro terá lugar o xoves 26 en Vigo, no Teatro Afundación, ás 20:30 horas. E, ao día seguinte, a orquestra tocará na súa sede, o Auditorio de Galicia, tamén ás 20:30 horas. En ambas actuacións levará a batuta o director francés Pierre Dumoussaud.

O alcalde mostrou hoxe o seu agradecemento a todas as entidades que están expresando o seu apoio á proposta para que o aeroporto de Santiago leve o nome de Rosalía de Castro, dende a aprobación dunha declaración institucional ao respecto no Pleno da Corporación do pasado xoves. Martiño Noriega explicou que o Concello daralle traslado do acordo ao Ministerio de Fomento e a AENA, de quen depende o cambio de denominación.

Este mediodía quedou aberta ao tráfico a avenida de Coímbra, despois das obras de reforma que se executaron na rúa dende finais de outubro. Os traballos, financiados con cargo aos remanentes dos presupostos de 2015, contaron cun orzamento de 60.434,24 euros, IVE incluído.

A praza do Obradoiro acolleu unha concentración para condenar o último asasinato machista, que deixou unha vítima en Navarra a fin de semana pasada, se ben o corpo foi atopado este xoves.

A concelleira de Deporte, Noa Morales, e o presidente da Asociación Compostela Esgrima, Xosé Piñeiro, presentaron o XI Open Compos de Esgrima, que se celebrará esta fin de semana no pavillón de Pontepedriña. Esta proba, que reunirá a máis de 150 tiradores e tiradoras de Galicia e de diversos puntos de España, é puntuable para o Ranking Galego de Espada e para o Ranking Nacional de Espada e Florete.