Noticias

O Pleno da Corporación aprobou hoxe un expediente de modificación de crédito que permitirá afrontar o pago de diversas sentenzas xudiciais que foron chegando ao Concello nos últimos meses, e que corresponden a casos derivados de mandatos anteriores. A decisión foi adoptada cos votos a favor de Compostela Aberta e a abstención dos tres grupos da oposición.

O alcalde de Santiago, Martiño Noriega fixo entrega dos premios da primeira edición do concurso de escaparatismo do Samaín, organizado polo Departamento de Comercio do Concello e que ten vocación de continuidade.

O 30 de novembro celébrase o Día Internacional da Cidade Educadora, unha data que o Concello de Santiago quixo celebrar mediante a lectura, por parte do alcalde de Santiago, Martiño Noriega, dun manifesto dos alcaldes e alcaldesas da Asociación Internacional de Cidades Educadoras.

A concelleira de Igualdade, Promoción Económica e Turismo, Marta Lois, entregou esta mañá os premios da primeira edición do concurso de ilustracións Recicla o xénero (Des)Igualdade Ilustrada, promovido dende a Concellería de Igualdade no marco do 25 de novembro, día da Eliminación da Violencia contra as Mulleres.

A mesa de diálogo co sector da hostalería nocturna rematou hoxe cun acordo para a aprobación dunha nova instrución sobre os aforos dos locais. O obxectivo é unificar os criterios, a partir do Código Técnico de Edificación que marca que a forma de evacuación dos locais ten que ser o que determine o seu aforo, máis alá das súas dimensións.

Un grupo de representantes dos Concellos de Área Santiago visitaron esta semana o municipio de A Veiga para coñecer de primeira man as experiencias deste Concello en turismo fluvial, especificamente en pesca fluvial. Esta visita enmárcase dentro do obxectivo de posicionar a Área Santiago como un destino turístico de pesca fluvial, aproveitando os múltiples recursos cos que contan os concellos do grupo.

Carlos Alba (Madrid, 1984), inaugura na Zona "C" The observation of trifles, intervención seleccionada na primeira convocatoria de apoio á creación en artes visuais da Concellaría de Acción Cultural, na modalidade de intervención artística. A inauguración será hoxe mércores, 30 de novembro, ás 20:00 horas, nun acto no que o artista estará acompañado polo concelleiro Jorge Duarte.

O concelleiro de Educación e Cidadanía, Manuel Dios, presentou as conferencias que terán lugar no próximo mes de decembro e que levan por nome Ler para comprender o mundo. Ese é o lema do simposio sobre o libro e a lectura que organizará o vindeiro mes a Asociación Galega de Editoras e o Departamento de Educación, en colaboración con Cedro e o Consello da Cultura Galega.

A Concellaría de Igualdade organiza un obradoiro de igualdade para este fin de semana, dirixido a traballar este tema cos homes. Trátase dun taller de autocoñecemento corporal que leva por nome Novas masculinidades.

A concelleira de Turismo, Marta Lois, e as organizadoras do Mercado da Estrela, Mónica Mejías e Elena Sánchez, presentaron no Pazo de Raxoi a quinta edición do evento, que se celebrará os días 17 e 18 de decembro coa colaboración de Turismo de Santiago. O Mercado da Estrela chega a súa quinta edición convertido nun festival urbano de inverno gratuíto para visibilizar o talento das persoas creadoras, artistas, artesáns, produtoras e emprendedoras de Galicia.