ACCIÓN SOCIAL
As entidades de acción social de Compostela analizan o proxecto de "Lei de autonomía persoal e dependencia"
O alcalde de Santiago de Compostela, Xosé A. Sánchez Bugallo e a concelleira de Benestar Social, Adelaida Negreira, acompañaron aos máis de cen participantes no inicio dun obradoiro de identificación de oportunidades, ameazas e estratexias que o proxecto de "Lei de autonomía persoal e dependencia" presenta ao terceiro sector. Este encontro reune na EGAP a entidades de acción social de Compostela.
EIXO ATLÁNTICO
O Eixo Atlántico e a Vicepresidencia da Igualdade colaborarán en diversas actividades para a xuventude
O alcalde de Santiago, Xosé A. Sánchez Bugallo, en calidade de presidente do Eixo Atlántico do Noroeste Peninsular, e o vicepresidente da Igualdade e do Benestar da Xunta de Galicia, Anxo Quíntana, asinaron un convenio de colaboración para o desenvolvemento de actividades no ámbito da xuventude durante o presente ano.
AEROPORTO
Nova conexión aérea de Air Berlín coa cidade austriaca de Linz
Dende o vindeiro 1 de maio, Air Berlín ofrece unha nova conexión aérea entre Santiago e Linz (Austria), vía Palma de Mallorca, con 4 voos semanais (luns, mércores, venres e domingos), dende 59€. A saída dende Santiago é ás 17:10 horas, mentres que o voo de Linz sae ás 11:55 h.
RECOLLIDA SELECTIVA
Os contedores amarelos teñen premio
Unha fin de semana para dúas persoas nunha casa de Turismo Rural é o premio que poderán gañar aqueles que mellor fagan uso do colector amarelo dende o 1 ao 30 de maio, dentro da campaña de recollida de plástico, latas e briks. A iniciativa, que chega á súa segunda edición, foi presentada pola concelleira de Medio Ambiente, Marta Álvarez-Santullano.
