Noticias

Os alcaldes de Santiago de Compostela, Xosé A. Sánchez Bugallo, e Barcelona, Jordi Hereu i Boher, inauguraron esta mañá a Avenida de Barcelona. O acto serviu para reafirmar a unión e amizade entre estas dúas cidades, irmandadas dende 1970.

A Xunta de Goberno local aprobou definitivamente o proxecto de urbanización do solo urbanizable non programado número 4 (SUNP-4), do Camiño Francés. Deste xeito, dáse un impulso definitivo á superficie na que irá o novo centro comercial das Cancelas. Tal como anunciou o alcalde días atrás, as obras poderán comezar en xaneiro.

O Concello investirá 59.835 euros na construción da rede de abastecemento de auga potable para os lugares de Torre e Igrexa (A Sionlla). O Goberno local aprobou o inicio do expediente de contratación destas obras, que teñen un prazo de execución de tres meses.

O Concello e a Vicepresidencia da Igualdade e do Benestar colaborarán na contratación e posta en marcha dun equipo de inclusión sociolaboral en 2007, no marco do II Plan Galego de Inclusión Social. Será posible en virtude dun convenio de colaboración entre as dúas institucións, cuxa sinatura recibiu o visto bo da Xunta de Goberno. A Vicepresidencia achegará 132.000 euros para esta fin.

O Hostal dos Reis Católicos, acolleu a presentación da memoria das actuacións realizadas no marco do Plan de Excelencia Turística (PET) entre 2001 e 2005 para mellorar a accesibilidade da cidade, os seus servizos e espazos turísticos e de lecer, a súa notoriedade internacional, a calidade e profesionalidade do sector e a sensibilidade local cara ao turismo.

O alcalde, Xosé A. Sánchez Bugallo, inaugurou, xunto á directora xeral de Interior da Xunta de Galicia, Isabel Gil; o xefe o corpo da Policía Local, Norberto Villaberde; a profesora titular de dereito procesal da USC, Raquel Castillejo; e o profesor da universidade Carlos III, Víctor Moreno, un curso sobre dereito procesal e penal dirixido ao corpo de policías locais de Santiago de Compostela.

O luns 11 de decembro, as 13.00 horas, o alcalde, Xosé A. Sánchez Bugallo, inaugurará a Avenida de Barcelona acompañado polo alcalde da cidade condal, Jordi Hereu i Boher, como mostra da unión e amizade entre as dúas cidades, irmandadas desde 1970. No acto descubrirase unha placa conmemorativa e plantarase unha árbore.

Un total de sesenta inmigrantes extracomunitarios do total de escolarizados en Compostela, solicitaron as axudas escolares que concede o Concello de Santiago. Dos beneficiarios, 36 eran nenos e 24 nenas.

O concelleiro de Facenda e Orzamentos, Xaquín Fernández Leiceaga, anunciou unha serie de cambios na xestión dos servizos de auga, saneamento e depuración do Concello de Santiago, dos que é concesionaria a empresa Aquagest. Estas modificacións permitirán ofrecer máis garantías aos usuarios e facilitar un maior control municipal destas taxas.

Artistas como Rosa Cedrón, Deluxe, Avalon, Isga Collective, Inquedanza, María Reimóndez, Chévere, Carlos Blanco, Emma Couceiro, Lucía Aldao, Rosa Aneiros, Álvarez Cáccamo ou Antía Otero daranse cita no Auditorio de Galicia o sábado 16, ás 20:00 horas , para participar no "Implícate! Noite de música e palabra solidaria", organizado por Implicadas no Desenvolvemento (IND) e co que colabora o Concello de Santiago. A gala será presentada por Yolanda Castaño e Paco Lodeiro.