Noticias

A concelleira en funcións de Centros Socioculturais, Guadalupe Rodríguez presentou a III Semana Cultural do Castiñeiriño. Do 12 ao 16 de xuño, todos aqueles que o desexen poden achegarse ata este centro sociocultural para gozar de diversas actividades para tódalas idades.

O Goberno local aprobou inicialmente o Estudo de detalle para a rehabilitación integral do Barrio de Vista Alegre, redactado polos arquitectos Celestino García Braña e Isabel Aguirre. Este traballo ofrece unha cobertura normativa aos cambios físicos que se producirán en virtude desta intervención, respondendo así mesmo ás demandas dos veciños.

A Xunta de Goberno local aprobou as listas provisionais de admisión e de espera para o curso 2007-2008 nas diferentes unidades das escolas infantís municipais de Conxo e de Fontiñas.

O Goberno local adxudicou á empresa Clece a explotación do Servizo de Axuda no Fogar no Concello de Santiago para os vindeiros dous anos. O importe queda fixado en 12,58 euros/hora en días laborables e a 13,49 euros/hora en domingos e festivos.

Turismo de Santiago, en colaboración coa Oficina de Voluntariado e o Consello Social da Universidade de Santiago, convoca un verán máis a todos os voluntarios que desexen formar parte da nova xeración de "chaquetas vermellas".

Santiago de Compostela estará representada polo seu concelleiro de Turismo en funcións no V Foro Internacional sobre Turismo para Parlamentarios e Autoridades Locais, que celebra a Organización Mundial do Turismo en Yasmine Hammamet (Túnez) entre o 13 e o 15 de xuño.

Un total de 58 persoas accedeu ao mercado laboral no último ano grazas ao Proxecto Crear III, desenvolvido pola Concellaría de Promoción Económica e Emprego. Este programa favorece a inserción laboral de persoas con especiais dificultades de acceso ao mercado de traballo, como mulleres, mozos sen emprego anterior, desempregadas e desempregados de longa duración, inmigrantes e emigrantes retornados e mulleres e homes con algún tipo de discapacidade.

Compostela viviu unha campaña máis o Día do Deporte. Persoas de todas as idades achegáronse a varios espazos da cidade para practicar diversas disciplinas deportivas nunha xornada lúdica e festiva. As actividades eran de balde.

Nun acto celebrado no Salón Nobre da Casa do Concello, o alcalde compostelán, Xosé A. Sánchez Bugallo, e a concelleira de Educación e Mocidade, Elvira Cienfuegos entregaron os premios do XII Concurso Literario Ánxel Casal, nas súas modalidades de conto, de teatro e de poesía.

O xurado do XI Concurso de Fotografía Deportiva, presidido polo concelleiro de Deportes, Manuel Portas, deu a coñecer o fallo do premio. O gañador foi Iván Carlos Franco Fraga, por unha fotografía titulada "Campolongo". Ao concurso presentáronse un total de 80 fotografías, das que se aceptaron 47 e se excluíron 33 por non cumprir coas bases.