Noticias

A participación en Compostela na IV Olimpiada Solidaria de Estudo deixou un balance de 680 participantes e 9.540 horas de estudo, sumando a achega dos centros socioculturais e da Universidade de Santiago. Estas horas solidarias converteranse en euros destinados a proxectos de axuda ao desenvolvemento.

"A historia que vivimos" é o título dun curso de formación que combina proxeccións cinematográficas con diversas charlas, dirixidas ao profesorado. O obxectivo da iniciativa é formar aos docentes sobre cine documental e historia de España.

A Fundación Compostela Deporte presentou a Volta Ciclista da Ascensión 2007, que se celebrará os días 17, 18 e 19 de maio. Esta proba, que conta cunha traxectoria de quince edicións, non se celebra desde 1991.

O sábado 17 de febreiro comezan as festas de Entroido de 2007. A música, a diversión e a boa comida están aseguradas nestes cinco días de festas, tal e como asegurou na presentación do programa carnavaleiro o concelleiro de Festas de Santiago, Xosé Baqueiro.

A Xunta de Goberno local adxudicou a asistencia técnica para a redacción do Plan de sectorización do SUND-39 (Campo de Bando) e do anteproxecto dun campo de golf, por un importe de 258.461 euros.

Os dereitos humanos son os protagonistas dun novo ciclo de cine no Teatro Principal. Do 15 ao 21 de xaneiro, os espectadores poderán asistir á proxección de filmes coma "O Pesadelo de Darwin", "Hanna K", "Estrelas da liña" ou "O crime de Cuenca". As sesións serán ás 20:30 e ás 22:30 horas.

A concesión dunha subvención do Ministerio de Industria, Turismo e Comercio, dentro do programa Cidades Singulares (Plan Avanza) achega a futura rede Wimax para o Casco Histórico. Este proxecto, que foi presentado recentemente, permitirá o desenvolvemento de servizos como a teleasistencia ou a telemedicina e beneficiará a comerciantes, turistas e cidadáns composteláns.

A Xunta de Goberno local aprobou o prego de cláusulas administrativas e o inicio de contratación de obras de mantemento e conservación de vías públicas municipais para o ano 2007, por un importe de 1.100.000 euros. Este plan permitirá mellorar a ampla rede de pistas do Concello.

O Consello Económico e Social acolleu a presentación das conclusións do Plan Estratéxico da cidade de Santiago, que establece o marco estratéxico sobre o que xirará o desenvolvemento futuro da cidade. Conseguir unha "base económica sólida, diversificada e competitiva" é un dos obxectivos prioritarios do Plan, que aposta por facer da calidade urbana un sinal de identidade de Santiago.

O alcalde, Xosé A. Sánchez Bugallo, achegouse ata Villestro para coñecer á nova directiva da asociación de veciños e visitar canda eles as obras realizadas na parroquia.