Noticias

O proxecto de urbanización da unidade de execución 4 (Caramoniña) do Plan especial de protección e rehabilitación da Cidade Histórica recibiu o visto bo definitivo do Goberno local. A concelleira de Rehabilitación e Cidade Histórica, Socorro García Conde, explicou esta actuación, que permitirá conectar funcional e esteticamente o parque de San Domingos de Bonaval e a extensión da cidade cara o norte a través da Almáciga.

As actividades previstas para o Antroido 2008, organizadas pola Concellaría de Festas, contarán cun orzamento de 118.914 euros. Nesta cantidade inclúese o pregón, o desfile do martes de Antroido, os bailes infantil e de adultos, a queima do Meco e diversas actividades nas rúas e prazas entre o 2 e o 6 de febreiro.

A Xunta de Goberno deu o visto boa o proxecto de urbanización da rúa de Betanzos, na Almáciga. O proxecto contempla a creación dun sendeiro peonil es escaleiras, que facilitará a accesibilidade.

A Xunta de Goberno aprobou o programa "Dinamizadores 2008" para o período comprendido entre xaneiro e xullo. O obxectivo desta iniciativa é o desenvolvemento de actividades culturais e de tempo libre nos centros e locais socioculturais que permitan a colaboración do voluntariado.

Os condutores composteláns responderon con prontitude á convocatoria dos Cursos de Condución Eficiente e xa esgotaron as prazas dispoñibles. Estas sesións impartiranse do 11 ao 13 de febreiro e teñen como obxectivo buscar un uso máis racional do vehículo e ofrecer un novo estilo de condución.

Tras a paréntese do Nadal, a Galería Sargadelos encheuse de novo de afeccionados á gastronomía, que puideron aprender diferentes e novidosos xeitos de cociñar marisco. Os chefs Juan Crujeiras e Antonio Alján amosaron o seu arte ante os fogóns explicando diversos xeitos de cociñar ameixas. Os máis de 45 asistentes gozaron ao finalizar o obradoiro da degustación do resultado.

O Centro Sociocultural e Xuvenil Municipal do Ensanche (Frei Rosendo Salvado, 14-16) acollerá ata o 29 de febreiro a exposición Invisíbeis, da fotógrafa e xornalista Esther Taboada. Inaugurada polo concelleiro de Mocidade, Xosé Baqueiro, o venres 18, a mostra recibiu tamén a visita do alcalde compostelán, Xosé A. Sánchez Bugallo.

Os Colexios Oficiais de Arquitectos do noroeste de España concederon o premio ARQAno de Arquitectura ao Concello de Santiago de Compostela, pola súa continua e atenta xestión urbanística.

O Dirección Xeral de Estradas do Ministerio de Fomento xa ten listo o proxecto do que será o terceiro carril do Periférico. Así o anunciou o alcalde compostelán, Xosé A. Sánchez Bugallo, quen se felicitou porque tamén saia adiante o cuarta das infraestruturas previstas no convenio asinado con Fomento en 2005.

As listas do censo estarán expostas ao público dende o día 21 ao 28 de xaneiro. Os cidadáns deben consultar a súa situación no censo electoral, especialmente as persoas que cambiaron de domicilio e os que cumpriron 18 anos.