Noticias

O Festiclown chegou ao seu fin, un ano máis, logo de facer as delicias de cidadáns e visitantes ao longo de cinco días de risa, humor e solidariedade. Máis de 50.000 persoas gozaron dos espectáculos de exterior e de interior, das 120 actuacións, dos 13 cursos de formación e das 45 compañías que se deron cita nesta edición do Festiclown.

O venres 10 de agosto remata o prazo para que as persoas emprendedoras poidan cubrir a enquisa que deseñou a Concellaría de Promoción Económica, Emprego, Comercio e Turismo co obxectivo de ofertar os cursos e os horarios máis demandados. A enquisa pode cubrirse na web da Concellaría, www.maiscompostela.org, no microsite dedicado ao programa de fomento da cultura emprendedora Compostela Activa.

O artista compostelán, Manuel Bonome Abeledo, foi recibido en Raxoi polo alcalde compostelán, Xosé A. Sánchez Bugallo. No encontro falaron da cesión dalgunhas das súas obras que o artista fará ao Concello.

O ministro de Cultura, César Antonio Molina, mantivo un encontro informal co alcalde, Xosé A. Sánchez Bugallo, que o puxo ao día sobre os proxectos da cidade xa encamiñados, algúns dos cales albergarán diferentes propostas culturais. Este é o caso do Museo de Santiago e das Peregrinacións e a Biblioteca Municipal de Xoán XXIII, que o alcalde espera ver inaugurada "antes de finais de ano".

Cando se cumpre o 50º aniversario dos cursos "Música en Compostela", considerados como os máis antigos de España, o Consorcio de Santiago reedita os dous primeiros volumes publicados respectivamente en 1994 e 1995 e presenta o terceiro tomo que comprende os anos que van dende 1995 ao 2007.

Os cursos internacionais Música en Compostela celebran a súa edición número 50. Para celebrar esta data, os seus responsables teñen preparado un interesante calendario de concertos e conferencias que completarán as tres semanas de clases.

O grupo de musica sinfónica vasco Tirri Tarra presenta en Galicia o seu espectáculo "Luz Negra/Argi Beltz", expresión do seu segundo disco, que leva o mesmo nome. Máis de 80 persoas subiranse ao escenario da Praza da Quintana, o sábado 4 ás 22:30 horas, nun concerto no que tamén participarán o Orfeón Terra a Nosa e a Orquestra Sotto Voce.

Na súa habitual rolda de prensa dos venres, o alcalde valorou a entrevista mantida o mércores 1 de agosto co presidente da Xunta, Emilio Pérez Touriño. Sánchez Bugallo repasou os temas da xuntanza e expresou a súa "plena satisfacción pola total sintonía" co titular do Goberno autonómico.

O Festiclown chega ao seu remate cunha fin de semana cargada de actividades. Ás seccións dos días anteriores únense sábado e domingo o II Encontro de Malabaristas, as Galas do Maraclown Solidario e a Clown Session. Así, na xornada de sábado tempo para gozar de novo co Maraclown polas rúas e, ás 19:00 horas, a primeira das galas do Maraclown Solidario. O Festiclown convoca estas galas por primeira vez co obxectivo de recadar fondos para a realización dunha nova caravana de Pallasos do Festiclown aos Municipios...

O luns 6 de agosto, ás 19:00 horas, a ludoteca infantil Gazafello inaugura as súas instalacións na rúa da Torreira cun programa de actividades gratuíto pensado para que tanto os nenos e nenas como os seus pais e nais poidan coñecer o seu local e os servizos que ofertan. Gazafello é unha empresa nacida a partires do Proxecto Equal Compostela Social, impulsado pola Concellaría de Promoción Económica, Emprego, Comercio e Turismo.