Noticias

Santiago foi o lugar escollido para presentar por primeira vez en España os Fear No Ice. Os americanos Scott Rella, Kevin Roscoe e Meter Slavin, recoñecidos como os mellores escultores en xeo do mundo, conseguirán crear na Praza do Obradoiro unha ampla gama de traballos artísticos en xeo. A cita é o domingo 10 de setembro.

O alcalde compostelán, Xosé A. Sánchez Bugallo, e o presidente da Fundación Españoles en el Mundo de Venezuela, Cándido Rodríguez Losada, asinaron esta mañá un convenio de colaboración, que permitirá coñecer mellor a situación dos emigrantes santiagueses residentes en Venezuela. O Concello achegará 3.500 euros para a realización dun estudio con este fin.

Despois das medicións realizadas polos técnicos municipais, a superficie queimada no termo municipal de Santiago é de 1.422 hectáreas, das que 900 hectáreas arderon só nas dúas primeiras semanas do mes de agosto, segundo anunciou o alcalde, Xosé A. Sánchez Bugallo. As parroquias de Figueiras e Villestro foron as máis afectadas.

O concelleiro de Transportes, Xaquín Fernández Leiceaga, presentou os novos horarios de inverno do servizo de transporte urbano. Os principais cambios afectan ás liñas 5, 13, C5, C6 e 11 e teñen o principal obxectivo de dar resposta á expansión da cidade.

O Pleno da Corporación Local, reunido en sesión extraordinaria, autorizou a apertura dun crédito extraordinario de 600.000 euros, para atender os gastos ocasionados polo operativo contraincendios do mes de agosto e para as actuacións de emerxencia destinadas a restaurar as zonas queimadas. O primeiro dos conceptos supuxo un gasto de 258.742 euros, mentres que as actuacións de emerxencia implicaron o investimento de 341.257 euros.

A Concellaría de Infraestruturas está a traballar actualmente na creación dunha rede de subministro de auga entre Son de Abaixo e A Grixoa para subministrar auga aos veciños da zona. O custo das obras é de 205.000 en A Grixoa e de 60.000 en Son de Abaixo. Así mesmo, proximamente levarase a cabo o asfaltado con aglomerado en quente entre estas dúas zonas, que conleva uns gastos de 60.000 euros.

O grupo de expertos que está a elaborar o documento "Sete ideas para sete anos decisivos" reuniuse en Santiago. O alcalde compostelán e presidente do Eixo Atlántico, Xosé A. Sánchez Bugallo, asistiu a esta xuntanza, na que se avanzou na concreción dos Segundos Estudos Estratéxicos desta asociación transfronteiriza.

Compostela está a rexistrar un verán "excelente" dende o punto de vista turístico, segundo indicou o concelleiro de Turismo, Francisco Candela, na presentación dos datos correspondentes ao mes de agosto. A presenza estranxeira ten cada vez máis peso, como o demostra o feito de que, no pasado mes, os turistas doutros países representaron un 37% do total, fronte ao 31% do mesmo período en 2004. En liñas xerais, agosto volveu a deixar resultados satisfactorios tanto no número de consultas como no de pernoctacións.

O 27 de setembro celébrase o Día Mundial do Turismo. Con motivo deste evento, Turismo de Santiago convida de novo a todos os composteláns a redescubrir a súa cidade a través da campaña "Vivir Compostela". Esta iniciativa permitirá aos veciños de Santiago achegarse á súa cidade e percibila dun xeito diferente, e todo dun xeito gratuíto.

Os técnicos municipais realizarán unha nova medición das hectáreas queimadas durante a vaga de incendios deste verán para zanxar definitivamente a polémica aberta en días pasados. Así o anunciaba o alcalde compostelán, Xosé A. Sánchez Bugallo, durante a visita que fixo a Vidán, unha das áreas nas que o Concello está a intervir de emerxencia para evitar a erosión do solo e para impedir que o arrastre dos restos orgánicos carbonizados poidan chegar ao cauce do río Sarela.