Noticias

A concelleira de Benestar Social, Mar Martín, recibiu no Pazo de Raxoi un grupo de peregrinos que se atopan nunha difícil e precaria situación. Realizaron o Camiño de Santiago acompañados polos membros das organizacións non lucrativas Igaxes3 e Fundación Rede de Apio á Integración Sociolaboral, que traballan con eles nos seus programas de atención.

O concelleiro de Relacións Institucionais, Andrés Fariña, participou en Pisa nun congreso sobre as "Políticas de inmigración" no marco da administración municipal. organizado pola cidade italiana dentro do programa de actos do irmandamento que se asinará o martes 16 coa cidade toscana.

Antes de dirixirse ao Teatro Principal para pronunciar unha conferencia titulada Ciencia básica, a esperanza do progreso, o Premio Nobel de Química en 2006, o estadounidense Roger Kornberg, pasou por Raxoi. Alí foi recibido pola concelleira de Educación, Mercedes Rosón, e asinou no Libro de Honra do Concello. O científico está en Compostela no marco do Programa ConCiencia.

A Policía Local realizou unha campaña de controis de velocidade entre o 13 e o 27 de maio en dúas rúas da cidade: a avenida do Cruceiro da Coruña e a rúa Torreira. Controláronse 1.770 vehículos, dos que unicamente 24 (o 1,36%) foron denunciados.

O tramo da rúa Montero Ríos entre a praza de Galicia e Xeneral Pardiñas gañará un carril mentres duren as obras desta última rúa ata Carreira do Conde. Á vista da conxestión de tráfico rexistrada a raíz do inicio desta actuación, incluída nos Fondos de Inversión Local (FIL), decidiuse darlle dous carrís e trasladar a parada dos taxis á marxe dereita en dirección á praza de Galicia.

O concelleiro de Promoción Económica, Emprego, Comercio e Turismo, Xosé Manuel Iglesias e a vereadora (concelleira) de Actividades Económicas e Turismo de Braga, Ana Paula Morais, asinaron un protocolo de colaboración. O seu obxectivo intercambiar experiencias en materia de dinamización empresarial e turística coa finalidade de deseñar accións para un máis efectivo desenvolvemento das respectivas economías locais.

A Escola Municipal de Verán de Inglés (English Summer School) volve a abrir as súas portas. Ata as 14.00 horas do sábado 13 de xuño estará aberto o prazo de inscrición para esta actividade, a desenvolver no IES Rosalía de Castro, que combina as clases de inglés con obradoiros para mellorar o nivel nesta lingua durante o mes de xullo. As solicitudes, que se poden recoller no departamento de Educación (rúa do Vilar, 13) ou descargar da páxina web municipal (www.santiagodecompostela.gal) deberán...

A Fase Final da Compostela Cup do Camiño 2009, organizada pola Fundación Compostela Deporte co patrocinio da Sociedade Xestora do Plan Xacobeo e Caixanova, comeza o venres 12 coa disputa da primeira xornada da modalidade de Fútbol 7 de veteranos. Dezaseis equipos loitarán ata o 21 de xuño polo título de campión. Os campos de As Cancelas e Santa Isabel serán os escenarios da competición.

Varias instalacións deportivas da cidade acollerán o sábado 13 de xuño unha nova edición do Día do Deporte. Este evento pon fin aos diferentes programas e campañas que se viñeron desenvolvendo no curso 2008-2009.

O Concello de Santiago segue a ter como unha das súas prioridades no ámbito educativo o incremento de prazas para nenos de 0 a 3 anos. Con tres escolas infantís xa funcionando, a do polígono do Tambre abrirá as súas portas no curso 2009-2010. A quinta escola estará detrás do Parlamento de Galicia e estará lista a primeiros de 2010.