Noticias

O alcalde compostelán, Xosé A. Sánchez Bugallo, reuniuse cos presidentes das principais asociacións empresariais da cidade para falar da presenza de Santiago na Expo Shanghai 2010. Todos eles manifestáronlle o seu apoio a esta participación, que consideran "unha honra e unha oportunidade única" para a cidade.

Entre novembro de 2007 e marzo de 2008, o programa Santiago de Compostela, repetirás facturou en venda directa 5.276 noites de aloxamento en 17 hoteis composteláns de unha a cinco estrelas. Así o indican os datos do turoperador Compostur, xestor das reservas efectuadas dende toda España e Portugal polas axencias Transhotel, Mundicolor e Viagal.

A directiva da Asociación de Periodistas de Santiago de Compostela (APSC) foi recibida en Raxoi polo alcalde compostelán. Na xuntanza, os xornalistas explicáronlle a Sánchez Bugallo as actividades que a entidade ten previstas para os vindeiros meses e o avance dalgunhas máis a longo prazo.

O pazo de Raxoi, sede da Administración Local, celebra ao longo do mércores día 23 de abril a xa tradicional xornada de portas abertas. Neste día todos os composteláns e tamén os turistas que queiran coñecer as dependencias municipais sitas na praza do Obradoiro poderán achegarse ata o Concello.

A Concellaría do Medio Ambiente e Desenvolvemento Sustentábel co-organizou unha plantación de árbores con motivo do Día da Terra con alumnado do Colexio La Salle. A plantación realizouse no marco do plan de restauración ambiental e acondicionamento do Pedroso que está realizando a Consellaría de Medio Rural. Na actividade participou, ademais da concelleira Elvira Cienfuegos, a delegada provincial da Consellería, Olga García Agra.

A Volta Ciclista da Ascensión celebra unha nova edición os días 1, 2 e 3 de maio nas categorías Elite e Sub-23. A proba aumenta en 2008 a súa calidade, pasando a ser a competición de maior rango que se dispute en Galicia das previstas para esta temporada nas probas por etapas, segundo o ranking da Unión Ciclista Internacional (UCI).

O alcalde de Santiago, Xosé A. Sánchez Bugallo, e o director xeral de Caixa Galicia, José Luís Méndez, asinaron un convenio de colaboración entre o Concello de Santiago e a Fundación Caixa Galicia para a realización de diferentes actividades culturais. O acordo renova a colaboración que ambas entidades veñen mantendo nos últimos anos e supón para Santiago unha importante axenda de actividades culturais para este ano 2008.

A Concellaría de Educación e a Asociación Provincial de Empresarios de Restauración poñen en marcha o programa didáctico Comer cos cinco sentidos. O seu obxectivo é promover hábitos saudables entre os escolares de educación infantil e primaria de Santiago.

Do 21 ao 27 de abril celebras a Semana de Acción Mundial pola Educación. ONGs, sindicatos do eido educativo, centros escolares e movementos sociais de diversa índole únense tamén en Santiago a esta iniciativa global, coa que se quere reclamar o cumprimento dos compromisos do Cumio de Dakar de 2000, onde a comunidade internacional se comprometeu a garantir o acceso a unha educación de calidade para todos antes do ano 2015.

A Xunta de Goberno aprobou a creación dunha comisión que avaliará os proxectos gañadores no concurso de ideas para a reordenación da Praza de Galicia. Esta comisión elaborará unha proposta, no prazo de dous meses, sobre a viabilidade das propostas gañadoras do devandito concurso.