Noticias

O alcalde compostelán, Xosé A. Sánchez Bugallo, e a conselleira de Política Territorial, Obras Públicas e Transportes, María José Caride, asinaron un convenio para a realización de diversas actuacións de mellora dos contornos urbanos nos accesos a Santiago de Compostela, cara a celebración do Ano Santo 2010. A Administración autonómica achegará dez millóns de euros en catro anos para estas obras e o Concello achegará outros sete millóns.

Unha delegación de xornalistas da Radio Internacional de China entrevistouse co concelleiro compostelán de Promoción Económica, Emprego, Comercio e Turismo, Xosé Manuel Iglesias, para coñecer a política turística desta cidade Patrimonio da Humanidade.

A compañía teatral Bacana trae ao Principal unha comedia musical romántica: Hendaya, mon amour. Os días 22 e 23 de setembro, ás 21:00 horas, o público compostelán ten unha cita con Paco (Francisco Frango) e Fito (Adolfo de Hit), os protagonistas desta paródica historia de amor avalada polos premios e polas risas dos espectadores.

O Concello de Santiago invita a todos os cidadáns a sumarse á campaña Vivir Compostela durante o mes de outubro, para redescubrir a súa cidade e gozar dos seus mellores recursos turísticos. Nas dúas anteriores edicións, máis de 19.000 cidadáns participaron nesta iniciativa. A principal novidade de 2007, as visitas á Cidade da Cultura.

A Xunta de Goberno do luns 24 aprobará as bases do concurso de ideas que permitirá seleccionar un anteproxecto para a remodelación e recuperación urbana da Praza de Galicia. O alcalde, Xosé A. Sánchez Bugallo, presentou as liñas básicas deste concurso, que definiu como "moi aberto".

A concelleira de Persoal e Reforma Administrativa, Rosa Fernández, presentou a proposta de creación e funcionamento de rexistros auxiliares para a entrada e saída de documentos. A Xunta de Goberno do luns 24 de setembro aprobará esta proposta, que crea rexistros nos centros socioculturais de Fontiñas e de Ensanche, e que concede á Oficina de Atención ao Contribuínte a facultade de admitir tamén a saída de documentos.

O alcalde, Xosé A. Sánchez Bugallo, anunciou que o no Pleno do martes 25 de setembro aprobarase definitivamente o Plan especial de equipamento docente de Monte Redondo (Montouto), que permitirá a construción do novo complexo do Colexio Manuel Peleteiro.

O Concello de Santiago de Compostela, a través da Concellaría de Benestar Social, aporta 2.500 euros á Asociación de Pais de Persoas con Trastornos de Espectro Autista da Provincia da Coruña (ASPANAES) para a posta en marcha dun servizo de transporte adaptado.

Na sede do Colexio Oficial de Enxeñeiros Técnicos Industriais, o ex-concelleiro e agora deputado autonómico, Luis Toxo, foi nomeado como colexiado de honra.

Santiago de Compostela foi elixido por Red.es, entidade dependente do Ministerio de Industria, Turismo e Comercio, para participar nun proxecto piloto para introducir as tecnoloxías da comunicación na xestión urbanística municipal. Esta iniciativa permitirá que calquera cidadán poida acceder de xeito doado ao planeamento municipal, que será dixitalizado.