Noticias

O Goberno municipal quere comunicar o luns 26 de xaneiro tivo lugar a comisión informativa de Facenda, na que se informou sobre o proxecto de orzamentos municipais para 2009.

O alcalde compostelán, Xosé A. Sánchez Bugallo, analizou na súa rolda de prensa semanal os orzamentos para 2009. Destaco o incremento que se produce nos gasto para atención social e para a xeración de emprego, así como a cantidade destinada a investimentos.

Os trámites para a construción do tramo da liña do AVE de entrada en Santiago xa están en marcha. O alcalde compostelán, Xosé A. Sánchez Bugallo, expresou a súa satisfacción por esta nova e agarda que no mes de febreiro se poida coñecer este proxecto.

Entre esvaróns, pequenas caídas e, sobre todo, moitos sorrisos, rematou a II Campaña escolar de iniciación á patinaxe sobre xeo, organizada pola Concellaría de Deportes en colaboración coa empresa XADE. Nesta segunda edición, a actividade resultou tamén un éxito de participación.

Turismo de Santiago estará presente en Fitur, a feira turística máis importante do Estado, que se celebrará en Madrid entre o 26 de xaneiro e o 1 de febreiro. O obxectivo do Departamento é promocionar a cidade no seu conxunto, seguindo a estratexia de promoción cara o Ano Santo Compostelán 2010, que marcará a promoción da cidade tanto estatal coma internacionalmente durante este ano.

A Plataforma de Intermediación Laboral da Concellaría de Promoción Económica, Emprego, Comercio e Turismo ten introducidos datos de 723 empresas fidelizadas e de 2.004 persoas que procuran emprego ou buscan mellorar as súas expectativas laborais. No último trimestre (novembro, decembro e xaneiro) estas empresas solicitaron persoal para cubrir 134 postos de traballo. O aplicativo informático da Bolsa de Emprego ten como obxectivo facilitar a prestación do servizo a través dunha xestión áxil e eficaz das ofertas e das...

Compostela será un dos escenarios onde se desenvolverá o programa FranceDanse Europe, organizado polo Culturesfrance, operador do Ministerio de Asuntos Exteriores e Europeos, e o Servizo Cultural da Embaixada de Francia en España. En concreto será o 19 de abril cando a compañía francesa de Catherine Diverrés presentará no Auditorio de Galicia, dentro do ciclo SCQ Danza, o seu espectáculo A quinta do xordo.

A concelleira de Educación, Guadalupe Rodríguez, presentou as oito funcións para escolares de 4 a 8 anos da obra didáctica A cama voadora que se celebrarán no Teatro Principal do 26 ao 29 de xaneiro. Esta iniciativa pretende desenvolver as capacidades estéticas dos nenos e nenas e crear neles unha afección que se irá enriquecendo ao longo da súa vida.

O concelleiro de Facenda e Orzamentos, Andrés Fariña, e a portavoz da Xunta de Goberno, Elvira Cienfuegos, presentaron as grandes cifras dos orzamentos municipais para 2009, aprobados nunha Xunta de Goberno extraordinaria. O orzamento de gastos ascende finalmente aos 115.889.950 euros, un 1,48% máis que en 2008.

O sábado 24 de xaneiro terá lugar a terceira sesión de Merco e cociño con..., conducido nesta ocasión polo prestixioso cociñeiro Marcelo Tejedor. Trátase dun innovador taller, incluído nas actividades do programa gastronómico Santiago Repetirás, organizado por Turismo de Santiago, no que os asistentes poden experimentar en que consiste un día na vida dun cociñeiro, facendo primeiro a compra do produto para convertelo a continuación nun suculento menú.