Noticias

O Grupo de Cidades Patrimonio da Humanidade de España, do que forma parte Santiago de Compostela, finalizou a súa participación nas xornadas de promoción e comercialización dirixidas a empresas do sector e institucións que organiza Turespaña na India.

A concelleira de Participación Cidadá, Guadalupe Rodríguez, presentou o programa Coñecendo o país, que permitirá aos composteláns participar en 17 rutas de sendeirismo e outras 13 gastronómicas. As primeiras serán principalmente os sábados, mentres as visitas ás feiras culinarias serán os domingos.

A concelleira de Educación, Mercedes Rosón, acompañada polo director xeral de Edicións Xerais de Galicia, Manuel Bragado, presentou as bases da convocatoria da XVI edición do Premio Literario Ánxel Casal, nas súas modalidades de conto, poesía e teatro. O certame, dirixido ao alumnos a partir dos 14 anos dos centros de ensino secundario de Galicia, repartirá 5.100 euros en premios.

O concelleiro de Promoción Económica, Emprego, Comercio e Turismo, Xosé Manuel Iglesias, presentou o programa de fomento do emprendemento Compostela Activa 2011. Enmarcado no Servizo de Apoio á Empresa, ten como obxectivo axudar a aquelas persoas que queiran desenvolver un novo proxecto empresarial no Concello de Santiago.

O Eixo Atlántico celebrou en Santiago a súa Asemblea Xeral, rematada a cal o organismo entregou as súas medallas de ouro ao xefe superior de Policía de Galicia, Luis García Mañá, e ao ex ministro de Economía de Portugal, Luis Braga da Cruz. O alcalde compostelán, Xosé A. Sánchez Bugallo, asistiu á Asemblea e a este acto protocolario.

As concelleiras de Educación, Mercedes Rosón, e de Medio Ambiente, Elvira Cienfuegos, acompañadas pola responsable dos programas de educación ambiental de ADEGA, Marga Miguens, presentaron a novena edición do Programa de Educación Ambiental. Este curso farase especial fincapé nas actividades relacionadas cos bosques, ao ser este 2011 o Ano Internacional dos Bosques.

Representantes de asociacións e organizacións sociais con sede na Casa das Asociacións mantiveron un encontro co alcalde, Xosé A. Sánchez Bugallo, e a concelleira de Benestar Social, Mar Martín. A reunión serviu para poñer en común os seus plans de traballo e para tratar de aproveitar sinerxías.

A lapona Mari Boine, unha das voces máis comprometidas coa súa cultura, será a protagonista do cuarto concerto da tempada 2010-2011 do ciclo Sons da Diversidade, organizado pola Concellaría de Cultura e Centros Socioculturais. A cita será o sábado 12 de febreiro ás 21:00 horas. As entradas están á venda na web de Caixa Galicia e no despacho de billetes do Auditorio. O prezo é de 15 euros, con descontos do 50% para menores de 25 anos e persoas xubiladas.

O alcalde compostelán, Xosé A. Sánchez Bugallo, mantivo unha reunión cos veciños de Meixonfrío no local social Casa Agraria. O encontro tiña como obxectivo presentarlles o proxecto da futura escola infantil do barrio, que estará situada na rúa do Lavadoiro.

A praza do Obradoiro acolleu a presentación das cinco novas unidades que incorpora o servizo de transporte urbano. Estes autobuses destacan polo seu moderno deseño exterior, máis adaptado aos novos tempos, e tamén polas solucións técnicas que incorporan. Teñen capacidade para 26 viaxeiros sentados e 65 de pé, ademais de espazo para unha cadeira de rodas.