Noticias

O alcalde, Xosé A. Sánchez Bugallo, asistiu á apertura das rúas Lino Villafínez e Modesto Brocos, que veñen de ser renovadas. En total, fixéronse 4.000 metros cadrados de pavimento vial con aglomerado en quente, e uns 1.500 metros cadrados con beirarrúa en baldosa. Ademais, catrocentos metros lineais ocupáronse cunha tubería de polietileno. En total, investíronse 280.000 euros nas obras.

O centro comercial Área Central acolleu o VIII Foro de encontro das Organizacións Non Gobernamentais, no que estas entidades deron a coñecer á cidadanía Compostela os seus materiais didácticos, proxectos e produtos de comercio xusto. O alcalde de Santiago, Xosé A. Sánchez Bugallo, e a concelleira de Educación e Mocidade, Elvira Cienfuegos, pasaron por este punto solidario.

O concelleiro de Promoción Económica e Comercio, Xosé Manuel Iglesias, entregou unha banda de recoñecemento a cada un dos comercios gañadores das diferentes edicións do Concurso de Escaparatismo "SCQ Shoping" dende o seu inicio, no ano 2004. A banda está deseñada para instalar nos escaparates das tendas. No seu percorrido polas distintos establecementos, Iglesias estivo acompañada por representantes das asociacións de comerciantes da cidade.

"TroulARTE" é o título da ludoteta itinerante que percorrerá en 2007 as escolas rurais de Santiago. Trátase dun proxecto de animación sociocultural destinado a nenos e nenas de idades entre 6 e 12 anos, que se integra no Plan de dinamización das escolas rurais de Compostela.

O alcalde compostelán, Xosé A. Sánchez Bugallo, anunciou que Francisco Candela, Mercedes Rosón e Teresa García-Sabell asumen provisionalmente as responsabilidades deixadas por Xaquín Fernández Leiceaga e Luis Toxo. Neste sentido, indicou que os dous novos edís tomarán posesión nun pleno extraordinario que se celebrará na semana do 5 ao 9 de febreiro.

Con motivo do XX aniversario da agrupación de comerciantes Acotés, e coa colaboración do Concello, creouse unha placa para identificar aos seus asociados. A primeira instalouse no local de Confecciones Riande, un dos negocios máis antigos de Santiago, e o primeiro que houbo na praza do Toural.

O alcalde compostelán, Xosé A. Sánchez Bugallo, presentou aos veciños das rúas Olvido, Pexego de Abaixo e Pexego de Arriba o anteproxecto de urbanización da praza do Olvido e o seu contorno. Grazas a esta actuación recuperarase para o uso público esta zona, cunha nova zona verde e unha praza na que desembocará a rúa do Olvido.

Coa colocación da primeira pedra, dáse inicio ás obras de saneamento da conca do río Aríns, un importante proxecto que suporá un investimento de máis de 10 millóns de euros, achegados entre o Concello, a Xunta e a Unión Europea. As obras comprenden tres actuacións: a construción da nova EDAR, a posta en marcha dos colectores xerais e a dos colectores secundarios.

Os afeccionados ao deporte e ao fútbol sala en particular teñen unha cita no Multiusos Fontes do Sar do 25 ao 28 de xaneiro, co Torneo Europeo de Clubes Campións de Copa de Fútbol Sala. A cidade está a vivir con expectación a celebración deste trofeo, na que o equipo local, o Autos Lobelle, aspira a conseguir o seu primeiro título europeo, tras acadar a Copa de España na anterior temporada. Antes da competición, os participantes acudiron a unha recepción en Raxoi.

O sábado 27, o Teatro Principal acolle a función número 200 de "Bicos con lingua", de Talía Teatro. Será unha representación especial, na que estarán todas as persas que colaboraron nesta montaxe, convertida xa en clásica nos escenarios galegos. A entrada é de balde, previa recollida da mesma no Principal.