Noticias

A concelleira de Medio Ambiente, Marta Álvarez-Santullano presentou unha nova edición da campaña informativa para mellorar o uso do colector amarelo. E un ano máis, este esforzo terá premio, en forma de 15 estancias dun fin de semana nunha casa de turismo rural.

A Concellaría de Educación e Mocidade pon en marcha un ano máis o Programa de concertos didácticos de música tradicional, que achegará aos centros de ensino a tradición musical galega. Uns 3.500 escolares de primaria e secundaria de 20 centros están chamados a participar, en horario lectivo, desta iniciativa, que converte á música nun mecanismo de desenvolvemento sociocultural, político e económico.

As Concellarías de Cultura e Educación e Mocidade veñen de por en marcha un proxecto para que os novos intérpretes composteláns se dean a coñecer no mundo musical da cidade apoiados por artistas xa máis recoñecidos. O ciclo "Revelando voces" acollerá no mes de marzo os concertos de sete artistas que mostrarán ao público o seu traballo dos últimos anos.

O Teatro Principal converterase de novo en pantalla de cine para a estrea do documental "China Blue", realizado polo director israelí Micha X. Peled. Este filme enmárcase na campaña "Roupa Limpa", que promove un comercio téxtil xusto e denuncia a explotación neste sector.

O alcalde, Xosé A. Sánchez Bugallo, mantivo unha reunión con técnicos do Instituto Galego de Vivenda e Solo, trala cal quedaron resoltos os problemas que afectaban á concesión da licenza de primeira ocupación dos polígonos 16 (Volta do Castro) e 9 (Belvís), promovidos polo IGVS e xa rematados.

A Comisión Executiva do Consorcio de Santiago acordou a compra aos seus 14 propietarios da finca da Selva Negra, por un importe de 4,12 millóns de euros. O órgano interadministrativo cederá este espazo, de 207.088 metros cadrados, ao Concello de Santiago, que o convertirá nun gran parque forestal público.

"Golfiño en portada" é o título da nova exposición que se exhibirá no Centro Sociocultural e Xuvenil do Ensanche ata o 31 de marzo. Trátase dunha selección de 15 cubertas do semanario de historietas "Golfiño".

O concelleiro de Relacións Veciñais, Manuel Portas, presentou as bases dunha nova convocatoria de subvencións para as actividades programas polas asociacións veciñais de Santiago. Nesta edición de 2007 a contía a repartir pasa de 80.000 a 100.000 euros.

O Colexio Vilas Alborada foi escenario dunha nova sesión do Programa de educación pola mobilidade, que está a desenvolver a Concellería de Educación e Mocidade en colaboración coa Fundación RACC. Esta iniciativa forma parte á súa vez do programa municipal "Onde está o perigo".

Algunhas das obras de teatro e danza máis destacadas do panorama español chegan un ano máis ás táboas do Principal e do Auditorio de Galicia. Veñen da man dunha edición de "Teatro en xira", unha iniciativa promovida pola Concellería de Cultura e a Fundación Caixa Galicia.