Noticias

O programa Imos ao baile 2016 ten este sábado dúas novas citas no marco da programación do Entroido, na Gracia e na Casa das Asociacións de Cornes. Esta iniciativa, que arrancou o pasado 30 de xaneiro cun baile no CSC de Laraño, ten previsto este ano 28 bailes, repartidos entre diferentes centros socioculturais e a devandita Casa das Asociacións.

As cidades Patrimonio da Humanidade están presentes no Salón des Vacances de Bruxelas, que se celebra o 4 ao 8 de febreiro, cunha importante acción promocional entre o público belga prevista no Plan Operativo de Turismo 2016, aprobado pola Asemblea de Alcaldes do Grupo celebrada o pasado 22 de xaneiro no marco de FITUR.

A Banda Municipal de Música de Santiago presentará este domingo, 7 de febreiro, un programa de estrea baixo a batuta do seu mestre titular Juan Miguel Romero. A cita, como cada domingo, é ás 12:00 horas no Teatro Principal.

A concelleira de Deportes, Noa Morales, presentou esta mañá en rolda de prensa o VIII Trofeo "Cidade de Santiago", que reunirá a preto de 300 judokas esta fin de semana. Na rolda estivo acompañada por Mario Muzas, presidente da Federación Galega de Judo, e Javier Rial, presidente do Compostela Judo Club.

O alcalde, Martiño Noriega, anunciou este mediodía o inicio dun procedemento "transparente e publicitado" para cubrir dúas prazas de Dirección de Área no Concello de Santiago. Unha delas estará vinculada ao Departamento de Espazos Cidadáns, e a outra estará adscrita á Alcaldía, con competencias en materia de persoal e contratación e cun perfil xerencial.

O Entroido dos Xenerais da Ulla, declarado Festa de Interese Turístico de Galicia, chega esta fin de semana a dúas parroquias de Santiago: Aríns e O Eixo. En Aríns, o atranque será o sábado, ás 18:30 horas, no campo da festa, na rúa San Martiño. No Eixo será o domingo, no campo da festa da parroquia, ás 19:00 horas. Na pasada fin de semana xa tiveron lugar os atranques de Marrozos e Angrois.

A próxima semana comezarán os traballos de reparación dalgunhas das fochancas máis graves da cidade. Anunciouno o alcalde, que explicou que o Concello habilitou un procedemento de emerxencia para poder actuar nos puntos que, segundo informes da Policía Local, son perigosos para a seguridade viaria. Martiño Noriega explicou que "as obras nas fochancas continuarán nos próximos meses, a través doutros procedementos que xa están tamén en tramitación".

O concelleiro de Medio Ambiente e Convivencia volveu defender onte en Madrid o proxecto da Vía Verde Santiago-Ordes, que o Goberno local está intentando recuperar en colaboración cos concellos de Oroso e Ordes. Aproveitando a súa viaxe para recoller un premio no Ministerio de Agricultura, Xan Duro mantivo dúas reunións con ADIF e coa Fundación de los Ferrocarriles Españoles, para lles pedir o seu apoio a unha actuación da que se empezou a falar en 2008.

O vindeiro luns, 8 de febreiro, iniciarase a segunda fase das obras de humanización da rúa Montero Ríos. Os traballos obrigarán a cortar totalmente, durante un período aproximado de dous meses, o tramo comprendido entre as rúas Rosalía de Castro e Rapa da Folla. Só poderán acceder os vehículos dos garaxes afectados.

O concelleiro de Medio Ambiente e Convivencia, Xan Duro, visitou este mediodía A Almáciga, para coñecer as hortas municipais que se van poñer a disposición da veciñanza a partir do próximo mes, xunto coas da Caramoniña e das Brañas de Sar. Xan Duro mostrouse satisfeito por recuperar por fin este espazo, que está vinculado ao corredor verde entre Bonaval e A Almáciga, no marco do proxecto Urbana Santiago Norte.