Noticias

O centro comercial Área Central acolleu o X Foro de Organizacións Non Gobernamentais, co que se abre a Quincena da paz, a convivencia e a solidariedade. Neste encontro, as ONG quixeron dar a coñecer o seu traballo solidario aos composteláns.

O Pleno municipal, en sesión extraordinaria e mediante sorteo público, elixiu aos 1.044 titulares e reservas das 116 mesas electorais nas que os cidadáns depositarán o voto nos comicios ao Parlamento de Galicia o 1 de marzo. Un total de 77.902 electores están chamados ás urnas en Compostela.

A Orchestra Baobab abre o sábado 31 de xaneiro unha nova edición de Sons da Diversidade. Esta viaxe polo mundo a través da música trae no primeiro semestre de 2009 un programa de seis variados concertos con intérpretes de diversas tradicións musicais.

O alcalde compostelán, Xosé A. Sánchez Bugallo, anunciou que o Ministerio de Administracións Públicas (MAP) xa aprobou 27 das 33 obras presentadas polo Concello para o seu financiamento a cargo do fondo estatal de investimento público. Unha vez que se aproben os seis restantes proxectos, o Concello prevé licitar todas as obras ao longo do mes de marzo, co obxectivo de que todas estean en marcha no mes de maio.

A Federación Española Empresarial de Transporte de Viaxeiros (ASINTRA) celebrou a súa Asemblea Xeral en Santiago. A esta reunión, celebrada no Hotel NH Obradoiro, asistiron os empresarios do sector do transporte de viaxeiros por estrada e representantes das administracións central e autonómica.

A Agrupación Deportiva Salesianos Don Bosco foi galardoada co Premio Especial Deporte e Vida por ser a entidade que, no primeiro ano do desenvolvemento do Plan Integral Deporte e Vida, destacou na aplicación conxunta da saúde, a educación, o benestar social e a non violencia na formación dos seus deportistas a través do deporte. A entidade recibiu o premio no transcurso da Gala do Deporte Compostelán, presidida polo alcalde e presidente da Fundación Compostela Deporte, Xosé A. Sánchez Bugallo, e que contou con Caixanova...

O Concello e o Ministerio de Fomento deron conta, nunha reunión celebrada na Cámara de Comercio, das modificacións e alteracións na circulación que sufrirá a zona do Hórreo derivadas das obras de construción do túnel. Estaban convocados todos os presidentes das comunidades de veciños do ámbito, aínda que a sesión foi aberta e estiveron presentes todos aqueles que o desexaron.

A concelleira de Educación, Guadalupe Rodríguez, presentou o X Foro das Organizacións Non Gobernamentais, co que se abre a Quincena da paz, a convivencia e a solidariedade. O sábado 31 de xaneiro, no Centro Comercial Área Central, celebrarase este encontro, no que máis de vinte entidades darán a coñecer á cidadanía compostelá os seus materiais didácticos, proxectos, produtos de comercio xusto e iniciativas.

Presentouse en Raxoi a obra teatral A estratexia da avestruz, que a compañía Teatro Ensalle vai poñer en escena no Teatro Principal os días 30 e 31 de xaneiro a partir das 21:00 horas.

Remataron esta mañá as representacións de A cama voadora no Teatro Principal. En total, foron oito funcións desta obra didáctica posta en escena por Calamar Teatro, ás que asistiron máis de 2.000 escolares de 4 a 8 anos.