Noticias

O alcalde de Santiago, Xosé A Sanchez Bugallo; o conselleiro de Traballo, Ricardo Varela, e o concelleiro de Promoción Económica e Emprego, Xosé Manuel Iglesias, visitaron o paseo do río Sarela rehabilitado polos 60 alumnos e alumnas do Obradoiro de Emprego Compostela Natural. As obras consistiron na rexeneración do cauce e apertura dun paseo á beira do río de 800 metros de longo por 1,35 de ancho, entre a igrexa do Carme de Abaixo e Casas da Ribeira de San Lourenzo.

A Xunta de Goberno adxudicou as obras do pavillón polideportivo de Fontiñas, por un importe de 1.687.543 euros. Este novo equipamento deberá estar listo en 14 meses.

Mañá, mércores 5 de novembro, dará comezo a 6ª Olimpiada Solidaria de Estudo, unha iniciativa que quere implicar aos mozos e mozas na consecución de fondos para financiar proxectos educativos no terceiro mundo a través do tempo que dediquen a estudar. Un ano máis, Compostela súmase a esta campaña a través dos centros socioculturais da Trisca, Conxo, Vite e Fontiñas.

O alcalde compostelán presidiu o Consello de Administración do Consorcio de Santiago, no que, entre outros acordos, aprobouse a conta xeral do exercicio de 2007 e o Plan de Mantemento de Edificios. Tamén se ampliou o prazo de concesión municipal para a explotación do Multiusos ata 2028, a cargo do Concello e da Sociedade Xestión de Actividades Deportivas e Espectáculos (XADE), así como as obras de acondicionamento nestas instalacións deportivas por importe de 1.678.837 euros.

Presentouse no Teatro Principal a proxección de A noite que deixou de chover, filme rodado integramente en Compostela que marca o comezo da edición XXII do Festival Cineuropa.