Noticias

Baixo o título Consorcio de Santiago, Cultura e Patrimonio. 25 anos do Consorcio na cidade, o organismo promove unha exposición que repasa a súa traxectoria. A mostra ten dúas sedes, a Casa do Cabido (na praza das Praterías), onde se reúne o labor cultural da entidade; e a Fundación Torrente Ballester, que concentra as súas actuacións no patrimonio histórico.

O cociñeiro Jorge Gago, do restaurante A Maceta, preparou en directo na praza Roxa a tapa gañadora do Premio do xurado da edición de Santiago(e)tapas 2016, "Xurelo San Simón". Con esta acción na rúa, no que participou a concelleira de Turismo, Marta Lois, anunciouse o comezo da décima edición do concurso de tapas de Santiago, que terá lugar do 2 ao 19 de novembro.

A Oficina de Información Turística de Turismo de Santiago estrea un novo espazo de acollida para turistas, peregrinos e visitantes que queiran deixar unha mensaxe recollendo as súas experiencias en Santiago e as emocións que lle transmite a cidade, nun proxecto que conta co financiamento da Xunta de Galicia a través da Axencia Turismo de Galicia.

A concelleira de Mocidade, Noa Morales, xunto con Nerea Couselo, de Xandoblea, e Hadrián Rei, da Asociación Cultural e Xuvenil Itaca, presentou a segunda edición do programa Boas Noites. Grazas a esta iniciativa, as noites de xoves a sábado do mes de novembro volverán estar cheas de actividades para a mocidade de Compostela.

O alcalde de Santiago, Martiño Noriega, e a concelleira de Políticas Sociais, Concha Fernández, mantiveron unha xuntanza esta mañá con representantes da Asociación de Pacientes e Usuarios do CHUS, e do sindicato SAGAP.

En novembro seguen as actividades no Centro de Interpretación Ambiental de Compostela (CIAC), situado no parque de Belvís. Para este mes programouse un obradoiro de lectura de etiquetas, unha mesa redonda sobre intervención sociocomunitaria e o habitual roteiro interpretativo polas Brañas do Sar.

O número de solicitudes para participar no Mercado de Nadal vai xa polas 130. A inscrición estará aberta ata as 19:00 horas do día 2 de novembro.

A concelleira de Igualdade, Marta Lois, deu conta da resolución aprobada o venres pasado pola Xunta de Goberno na que se concedían as subvencións a entidades que realizasen actividades a favor da igualdade entre homes e mulleres, e de prevención e loita contra a violencia machista. En total son 12 as asociacións as que acceden ás axudas nesta oitava convocatoria, que aumentou a partida orzamentaria por segundo ano consecutivo, pasando dos 20.000 aos 27.000 euros.

O alcalde de Santiago, Martiño Noriega, reuniuse cunha representación da directiva da Confederación de Empresarios da Coruña, encabezada polo seu presidente, Antonio Fontenla.

O Consorcio de Santiago acaba de adxudicar as obras de reparación de varias cubertas do Auditorio de Galicia á empresa Rehabita, Gestión Integral de Rehabilitaciones y Restauración, S.L., por un importe global de 356.950 euros. O prazo de execución estimado destes traballos será duns dez meses.