ALCALDÍA

A Comisión Executiva das Cidades Patrimonio españolas aprobou un orzamento de 1,6 millóns de euros para 2013

15/03/2013 Santiago de Compostela recibe esta fin de semana aos alcaldes do Grupo Cidades Patrimonio da Humanidade de España, que entre hoxe e mañá celebran na capital galega a súa Comisión Executiva e a Asemblea para definir os proxectos comúns que desenvolverán ao longo do 2013.

Os doce alcaldes invitados - Pedro Arahuetes García, de Segovia, presidente do GCPHE; Pedro Acedo Penco, de Mérida; Juan Manuel Ávila Francés, de Cuenca; José Félix Ballesteros Casanova, de Tarragona; Francisco Javier Bello Nieto, de Alcalá de Henares; Fernando Clavijo Batllé, de San Cristóbal de la Laguna; Alfonso Fernández Mañueco, de Salamanca; Emiliano García-Page, de Toledo; Miguel García Nieto, de Ávila; Elena Nevado del Campo, de Cáceres; José Antonio Nieto Ballesteros, de Córdoba, e Marienna Sánchez-Jáuregui de Ibiza- e o seu anfitrión, o rexedor de Santiago de Compostela, Ángel Currás Fernández, dirimirán en Santiago de Compostela asuntos que van dende a aprobación do orzamento do grupo para o ano 2013 ata a ratificación do Plan Operativo 2013 e a contratación do xerente que xestionará o Plan Estratéxico do grupo durante tres anos.

Tamén serán recibidos en audiencia polo presidente da Xunta de Galicia, Alberto Núñez Feijóo, o sábado 16, ás 10:00 h, no salón nobre do Pazo de Raxoi.

Comisión Executiva
O programa do venres 15 comezou coa chegada dos alcaldes ao Concello de Santiago ás 17:45 h, cando o presidente de Cidades Patrimonio, Pedro Arahuetes García, alcalde de Segovia, asinou no libro de ouro no despacho do alcalde compostelán.

A continuación celebrouse a reunión ordinaria da Comisión Executiva, no salón verde, coa participación dos alcaldes de Segovia, Ávila, Alcalá de Henares, Toledo e Santiago de Compostela. A orde do día comprendía a aprobación dos orzamentos do 2013 e a proposta de contratación do xerente. Seguidamente tratáronse os asuntos da Comisión de Patrimonio e Cidade –dictámenes da subvención de 2012 e proposta de subvención de 2013-; da Comisión de Educación e Cultura –proposta do programa de educación e das actividades culturais para a celebración do 20 aniversario da fundación do GCPHE en 1993- e asuntos da Presidencia, relativos ao Premio Patrimonio e á modificación do regulamento de sesións de traballo.

Ao finalizar a comisión, os alcaldes asistirán, ás 20:30 h no Hostal dos Reis Católicos, ao concerto de presentación do VII Festival de Músicas Contemplativas, coa actuación dos grupos de cámara da Escola de Altos Estudos Musicais.

Un orzamento para a promoción conxunta
O sábado 16 comezará coa audiencia que manterán os trece alcaldes co Presidente da Xunta de Galicia, Alberto Núñez Feijoo, no salón nobre do Pazo de Raxoi (10:00 h. Xunta de Galicia).

Ás 10.30 terá lugar a Asemblea de Alcaldes, na que o grupo ratificará os acordos alcanzados nas últimas comisións executivas. Destacan, entre eles, a ratificación do Plan Operativo do 2013, a aprobación do orzamento de 1,6 millóns de euros para 2013 e a contratación do seu novo xerente, que se encargará da execución do Plan Estratéxico Plurianual nos vindeiros tres anos.

No Plan Operativo do 2013 as Cidades Patrimonio repasarán as actuacións de promoción e comercialización turística previstas nos convenios que asinan anualmente con Turespaña, Renfe e Paradores, e que supoñen a divulgación da súa imaxe e atractivos nas feiras e eventos dos máis importantes mercados emisores do mundo. As trece cidades españolas con recoñecemento da Unesco suman máis de 500 monumentos de interese cultural, preto de 48.000 prazas hoteleiras e máis de 2.000 restaurantes, un conxunto que recibe a visita de máis de 4 millóns de viaxeiros anuais.

Tras a asemblea, o programa contempla a rolda de prensa (12.30 h) no salón verde, a foto de familia na Praza de Obradoiro, a visita guiada á Cidade da Cultura.

O GCPHE foi creado no 1993 co gallo de "actuar de maneira conxunta na defensa do patrimonio histórico e cultural destas cidades e no mantemento e potenciación das súas formas de vida, realizando proxectos comúns e establecendo políticas de intercambios de experiencias".

Compartir: