SERVIZOS
Máis de dez colectores queimados e unha caseta incendiada na avenida de Novoa Santos, balance da folga do lixo na madrugada do sábado ao domingo
16/05/2010 O Concello de Santiago reitera a súa enérxica condena aos actos vandálicos nos que está derivando a folga dos traballadores do servizo de recollida do lixo. Nesta última madrugada do sábado ao domingo, os Bombeiros tiveron que realizar 12 saídas para atender as diversas incidencias. O balance desta noite deixa entre 10 e 15 colectores queimados, maioritariamente arredor do Campus Sur.
Entre as 5:05 e as 6:48 horas sucedéronse varias chamadas ao Servizo de Bombeiros e á Policía Local alertando da queima de contedores en diversos puntos do Campus Sur e nas zonas de Santa Marta e Carme de Abaixo. O resultado final foi de entre 10 e 15 colectores queimados na avenida Novoa Santos, na rúa Joaquín Díaz de Rábago, e na avenida López de Marzoa, entre outras. En Novoa Santos queimaron ademais unha caseta que é utilizada como almacén pola empresa URBASER para gardar distintos utensilios para a recollida de lixo.