REFORMA ADMINISTRATIVA

A Carpeta Cidadá engade aos seus servizos as solicitudes de certificados de empadroamento e de convivencia

26/03/2008 A concelleira de Réxime Interior e Reforma Administrativa, Rosa Fernández, presentou tres novos servizos que xa ofrece a Carpeta Cidadá desta web municipal: a posibilidade de solicitar en liña certificados de empadroamento e de convivencia, e a autoliquidación de plusvalías.

Estes novos servizos van na liña de incremento progresivo de servizos da Carpeta Cidadá, que dende hai unhas semanas –lembrou a concelleira- xa é accesible mediante o DNI electrónico, ademais de polo sistema habitual de Usuario e PIN outorgando na Oficina de Atención ao Cidadán. Sobre os novos servizos, Rosa Fernández destacou "a importancia de poder recibir, sen desprazamentos, os certificados de empadroamento en períodos nos que, por exemplo, se deben solicitar prazas escolares".

"Este é o inicio dun camiño que, no futuro, nos permitirá que os propios cidadáns poidan modificar a través da web aqueles datos que non necesiten soporte documental", apuntou. Os cidadáns que soliciten os certificados de empadroamento ou de convivencia a través da Carpeta, mediante un sinxelo formulario, recibirán o documento por correo no seu domicilio. O seguimento do trámite realizarase por correo electrónico.

O responsable do Departamento de Informática, Jesús Rodríguez, explicou o funcionamento deste trámite, ao igual que a outra novidade: a autoliquidación de plusvalías. Cubrindo os distintos apartados do formulario, o cidadán poderá xerar unha autoliquidación por calquera venda, co importe que deberá pagar. E se o desexa, poderá completar o proceso e facer o pago.

Incremento progresivo dos servizos
A Carpeta Cidadá está incrementando progresivamente os seus servizos, co obxecto de facer cada día máis sinxelos e rápidos os trámites dos cidadáns ante a Administración. Na actualidade, a través deste portal pódense realizar os seguintes trámites económicos: consulta de recibos e liquidacións, pago en liña de recibos e liquidacións, impresión de documentos de pago, solicitude de novos períodos de pago de recibos fóra de prazo, domiciliación de recibos, cambio de enderezo de notificación de impostor, autoliquidación de vehículos (colaboradores sociais), autoliquidación de plusvalías e pago en liña de autoliquidacións modalidade 3. Noutros ámbitos, está dispoñible a solicitude de paso e parada de vehículos e, agora, os certificados de empadroamento/residencia e de convivencia.

Compartir: