ALCALDÍA
Xuntanza do goberno coa Asociación de Veciños de San Xoán de Fecha
01/09/2023 No marco da rolda de contactos que o goberno municipal está mantendo con colectivos veciñais, a alcaldesa, Goretti Sanmartín; a concelleira de Medio Rural e Relacións Veciñais, Pilar Lueiro; o concelleiro de Vías e Obras, Suso Domínguez; e o concelleiro de Mobilidade, Xan Duro, mantiveron esta semana unha xuntanza cunha representación da Asociación de San Xoán de Fecha.
No encontro tratáronse demandas en canto a melloras para a parroquia relativas a desbroces, abastecemento de auga, mantemento do viario público e acondicionamento de equipamentos comunitarios. Entre os acordos que se tomaron na xuntanza, cabe sinalar que o Concello se comprometeu a acondicionar o lavadoiro público da aldea de Fecha, que na actualidade presenta deficiencias na súa estrutura, sobre todo na cuberta, e a dotalo dunha canalización de auga axeitada. Tamén se acordou dotar de abastecemento de auga o local social situado en Lamascal e solucionar así unha das demandas históricas desta parroquia.