DEPORTES

O Auditorio acollerá o vindeiro mércores a gala de entrega dos Premios Santiago Deporte

12/02/2020 Os IV Premios Santiago Deporte terá a súa gala o vindeiro mércores, 19 de febreiro. Na cerimonia, que comezará ás 20:00 horas, entregaranse os galardóns das 12 categorías desta edición, catro máis que na anterior, e a mención especial.

A concelleira de Deportes, Esther Pedrosa, e o xornalista Manuel García Reigosa, integrante do comité avaliador, presentaron os detalles destes Premios Santiago Deporte, que serven de recoñecemento público ás persoas, entidades, centros educativos e empresas que polo seu labor ao longo da tempada 2018/19 ou do ano 2019, contribuíron ao fomento da práctica da actividade física e do deporte en Compostela. Os galardóns consisten nun diploma acreditativo e nunha medalla conmemorativa personalizada.

Unha das novidades desta edición é a incorporación de catro novas categorías, que se suman ás oito xa existentes. Ademais, en cinco das categorías –deportista feminina, deportista masculino, deportista feminina de base, deportista masculino de base e deporte adaptado- as/os gañadoras/es coñeceranse desvelaranse na propia gala.

Premiados/as
Na categoría de deportista feminina, as tres finalistas son Ruth Lorenzo Couso (karateka do Club San Francisco Teo), Carmen Sumay Dios (porteira do Victoria FC) e a golfista Fátima Fernández Cano. Ao galardón ao mellor deportista masculino optan José Pozas Checa (xogador do Monbus Obradoiro), Borja Iglesias Quintás (futbolista do Betis) e Alberto Mirás Neira (xogador do Santiago Futsal). No deporte de base, a mellor deportista feminina sairá de entre Martina Flores Álvarez (xogadora do Squash Club Santiago), Carlota Villaverde Agra (nadadora do Club Cidade de Santiago) e Nerea Liste Alfonsín (baloncestista do Instituto Rosalía Fedesa), mentres que en categoría masculina os candidatos son Igor Arce Rodríguez (nadador do Club Cidade de Santiago), Alejandro Harguindey Maneiro (xogador do Baskonia) e Martín Casal de la Fuente (ximnasta do Club Viravolta).

O outro galardón que se desvelará na propia gala é o de deporte adaptado, ao que optan Cristy Shedimar Tojo Velasco (karateka do Ávalon Kai), o xinete Jonathan Barral Otero e o profesor de golf José Antonio Rey Pazos.

A entidade deportiva máis destacada desta edición é o Club Ximnasia Rítmica Viravolta, mentres que a entidade educativa galardoada será o Colexio La Salle. O recoñecemento ao patrocinio deportivo recaeu no Grupo Arcade Inforhouse. Tamén se premia ao Centro Xuvenil Don Bosco como promotores da mellor actividade ou acción social.

O galardón ao/á adestrador/a máis destacado/a recibirao "Chivi" García Rouco, do Victoria FC, e recoñecerase o labor como árbitro de Jacobo Rial Barreiro, colexiado na ACB.

O premio honorífico desta edición á traxectoria deportiva será para o atleta Pedro Nimo del Oro. Finalmente, haberá unha mención especial á figura de José Luis Fidalgo "Veloso", un dos grandes deportistas nados en Santiago, falecido o pasado 13 de novembro.

Compartir: