XUNTA DE GOBERNO

Adxudicadas as obras de rexeneración da calzada Ponte Marzán-Sandino-Cruceiro de Sar

27/04/2018 A Xunta de Goberno adxudicou hoxe as obras de rexeneración da calzada no eixo Ponte Marzán-Sandino-Cruceiro de Sar, unha actuación á que se van destinar máis de 350.000 euros. Trátase do viario que conecta a parroquia de Aríns co centro da cidade, coincidente en parte do seu trazado coa Vía da Prata.

O alcalde, Martiño Noriega, quen deu conta dos acordos da reunión ordinaria do Goberno, indicou que será a empresa Asfagal Técnicas Viarias SL a que se encargue dos traballos, que teñen un prazo de execución de seis meses. O viario Ponte Marzán-Sandino-Cruceiro de Sar atópase actualmente en mal estado de conservación. O obxectivo do proxecto é renovar por completo o firme, ao tempo que se realizarán reparacións puntuais nas beirarrúas e se acometerán obras para mellorar a accesibilidade nos pasos de peóns existentes. A actuación será respectuosa coas especiais condicións dun viario que coincide en parte do seu trazado coa ruta da Prata.

Plan Especial
Na Xunta de Goberno de hoxe tamén se aprobou de maneira provisional a modificación puntual do Plan Especial de Protección e Rehabilitación da Cidade Histórica para limitar os aloxamentos de carácter temporal no tecido residencial. O documento será agora remitido á Xunta, que ten un prazo de dous meses para informar. Posteriormente, a modificación puntual recibiría luz verde definitiva no Pleno da Corporación.

O obxectivo da modificación é impedir ou limitar a implantación de novos establecementos hoteleiros e aloxamentos turísticos no tecido residencial da cidade histórica, para mantela como "espazo habitado". Os informes que acompañan a modificación puntual do Plan Especial advirten dos riscos que supón o fenómeno dos aloxamentos turísticos, e tamén da perda continua de poboación no ámbito da cidade histórica.

Outros acordos
Na reunión desta mañá, o Executivo tamén acordou a sinatura dun convenio de colaboración entre a Concellería de Igualdade, Desenvolvemento Económico e Turismo e a Fundación da Cidade da Cultura, para a promoción e celebración do programa Compostela Móvese 2018.

Por último, a Xunta de Goberno deu conta da resolución de alcaldía para aceptar a petición de cese presentada pola Interventora Xeral do Concello de Santiago. A decisión será comunicada á Secretaría Xeral de Financiación Autonómica e Local do Ministerio de Facenda.

Documentos relacionados

Direccións relacionadas



Compartir: