TURISMO

Turismo de Santiago confirma na ITB o interese pola cidade dos mercados de Europa do Norte

07/03/2018 Turismo de Santiago participa na ITB, principal feira de turismo do mercado alemán, que se celebra en Berlín do 7 ao 11 de marzo. A participación da entidade municipal de promoción turística na ITB é unha das súas accións máis importantes do ano, xa que o mercado alemán é un mercado prioritario para a cidade.

O mercado alemán marcou no 2016 un novo récord de pernoctacións en Santiago, con 76.938, logo de que no 2015 superase por primeira vez as 70.000 noites nos hoteis da cidade. Os datos do 2017 non están aínda dispoñibles, pero a estimación é que se superasen estas cifras e se marcase un novo máximo, grazas en boa medida á chegada de Lufthansa a aeroporto de Santiago.

O mercado alemán marcou tamén no 2017 un novo máximo no Camiño de Santiago, con 23.227 peregrinos, cun crecemento do 9,43% respecto do 2016. Precisamente, o crecemento do mercado alemán en Santiago motivou que Lufthansa ampliase xa este ano a súa oferta de prazas nas rutas a Frankfurt e Munich, que estreou o ano pasado con 37.000 pasaxeiros e que este ano superarán os 50.000.

Nos tres primeiros días, o acceso á feira está permitido só para os profesionais: axentes de viaxes, turoperadores, prensa, organizadores de congresos… Durante estes tres días, os técnicos de Turismo de Santiago manterán unha axenda de reunións con distintos profesionais interesados na cidade e no Camiño de Santiago.

Os dous últimos días da ITB diríxense ao público xeral. Neste par de días, no mostrador de Turismo de Santiago poderá comprobarse o interese crecente do público alemán tanto por Santiago como destino cultural, como polo Camiño de Santiago, como unha experiencia na que se sintetizan cultura, historia, patrimonio e natureza.

Chárter de Estonia
A ITB, ademais de ser un foro para a promoción no mercado alemán, tamén é unha oportunidade para establecer lazos con outros mercados do norte e do leste de Europa. Na edición deste ano, Turismo de Santiago xa recibiu a confirmación de que a finais de mes chegará a Santiago un grupo de 180 persoas procedentes de Estonia, mercado emerxente do Norte de Europa, que chegarán a cidade cun voo chárter da man da axencia estonia Aurinko, coa que Turismo de Santiago mantivo diferentes reunións de traballo en edicións anteriores da feira.

O grupo da axencia estonia Aurinko é un exemplo do interese crecente pola cidade nos mercados do Norte de Europa, entre os que destacan Dinamarca, que supera os 2.500 peregrinos ao ano; Suecia, que chega aos 1.500; e Finlandia, que está preto dos 1.000. Estes mercados son moi interesantes para a cidade porque, pese a ter poboacións pequenas, teñen un poder adquisitivo moi alto.

Compartir: