Noticias

O alcalde de Santiago, Xosé Sánchez Bugallo, e a concelleira de Políticas Sociais, Mila Castro, acompañados por Eva Vera, directora territorial do FSG Galicia, e representantes dos demais grupos municipais, participaron esta mañá no acto de conmemoración do Día Internacional do Pobo Xitano, que tivo lugar o pasado 8 de abril. Durante o acto deuse lectura a un manifesto e tamén se levou a cabo a Cerimonia do río e o canto do himno Gelem, Gelem, símbolos deste colectivo.

A Xunta de Goberno Local aprobou a memoria programática e económica por importe de 9.021,68 euros, do "XXVII Certame de Teatro Intercentros 2023". Trátase dun programa da Concellaría de Educación, destinado a alumnado de primaria e secundaria da comarca de Santiago, que coincide no tempo co curso escolar. De outubro a abril prepáranse as distintas obras, que se presentan ao público no mes de maio.

A Xunta de Goberno Local aprobou hoxe o proxecto de Regulamento do Consello Municipal da Cidade Histórica. Dito Consello é un órgano colexiado de participación para a consulta, asesoramento, proposta e seguimento das accións encamiñadas á conservación patrimonial, promoción e representación dos intereses colectivos das persoas que residen na zona vella.

As artistas urbanas Eloise Gillow, Amaia Arrazola, Julieta XLF e Doa Oa serán as encargadas de realizar os catro novos murais do festival feminista de arte urbana e contextual que, nesta edición especial, contará con obradoiros para familias, roteiros, coloquios e proxeccións, entre outras actividades. Nos meses de xuño e xullo, o Delas Fest concentrará a súa actividade en Compostela, cunha xuntanza entre as artistas convidadas e a veciñanza, un roteiro feminista de arte urbana e celebración do FAMILIA DELAS FEST!

A praza do Obradoiro acolleu este mediodía un minuto de silencio pola muller asasinada onte na provincia de Huelva, última vítima de violencia machista.

Efectivos da Policía Local detiveron onte dous individuos que se deron á fuga nun coche despois de quitarlle o bolso a unha muller mediante un tirón, nas inmediacións dunha sucursal bancaria da vía Edison.

A pasada fin de semana levouse a cabo a plantación de 500 novas unidades de especies autóctonas na zona do aparcadoiro-área de recepción da aba do Monte Viso. Nesta ocasión a plantación realizouse con "bolas de sementes", unha técnica coñecida como "Nendo Dango" que foi desenvolvida en Xapón nos anos 60 do pasado século, e coa que se pretende acadar a rexeneración ecosistémica da zona.

Este proxecto, realizado en colaboración co Consorcio de Santiago, busca estudar o comportamento colonizador das plantas nas xuntas do pavimento da cidade histórica.

O Goberno municipal aprobou hoxe, inicialmente, o estudo de viabilidade económica-financeira e o anteproxecto como actuacións preparatorias do expediente de concesión de servizo (e máis a obra) de explotación do complexo deportivo no barrio de Santa Marta. Agora, tal e como explicou o alcalde, Xosé Sánchez Bugallo, ambos proxectos vanse someter a información pública polo prazo dun mes, antes de saír a licitación. Segundo sinalou, o complexo tería capacidade para 5.000 persoas.

A Xunta de Goberno local aprobou hoxe o expediente de contratación do "Servizo para a execución de diversas operacións de desbroza, limpeza e mantemento de marxes e drenaxes de viarios, carreiros fluviais e parcelas municipais do termo municipal de Santiago de Compostela (2023-2025)" que sae a licitación por 790.000 euros repartidos nas seguintes anualidades: 200.800 en 2023, 395.000 en 2024 e 194.200 euros en 2025. O actual contrato, finaliza a finais de xullo deste ano.