ALCALDÍA
O Concello aproveitará unha campaña de educación viaria para pulsar a opinión das persoas maiores sobre a mobilidade urbana
O alcalde de Santiago, Agustín Hernández, presidiu o acto de presentación do programa de Educación Viaria Mobilidade sénior, o camiño de todos, dirixida a un dos grupos máis vulnerables en canto os accidentes de tráfico como son as persoas maiores. Esta iniciativa, organizada polo Concello de Santiago e a Fundación Real Automóbil Club de España (RACE), inclúe varias actividades para grupos de persoas maiores, a desenvolver entre o 28 e o 31 de outubro no parque da Alameda.
CONSORCIO
Unha exposición reúne 60 fotografías que ilustran a gama de cores de Santiago
O Consorcio de Santiago inaugurou a exposición Gold, green and black no soto do Museo das Peregrinacións e de Santiago. A mostra reúne 60 fotografías que ilustran a gama de cores tan característica da cidade compostelá. Son imaxes dos fotógrafos galegos Alberte Peiteavel, Adolfo Enríquez e Tono Arias e da deseñadora Uqui Permui, directora da montaxe. Ao acto de inauguración asistiron, ademais dos autores, o alcalde de Santiago, Agustín Hernández, e a concelleira de Cultura, María Antón.
CULTURA
Danza coa compañía La Intrusa e concerto de Nikki Hill no programa cultural do mércores
Dentro da programación cultural do Concello de Santiago, este mércores temos danza contemporánea e música de jazz. Ás 21:00 horas, no Teatro Principal, a compañía catalá La Intrusa presenta Best of you, con Virginia García e Damián Muñoz dentro do ciclo Teatro & Danza. E ás 21:30 horas, na Sala Capitol, poderemos escoitar á diva do soul e do blues Nikki Hill nun concerto enmarcado no ciclo Blues Nite by 1906.
CONSORCIO
A Real Filharmonía de Galicia participa nas III Xornadas de Música Contemporánea
No marco das III Xornadas de Música Contemporánea, a Real Filharmonía de Galicia celebra un concerto o xoves 30, ás 21:00 horas, no Auditorio de Galicia. Ao día seguinte, venres, a orquestra trasladarase a Vigo, onde actuará no Centro Cultural de Afundación ás 20:30 horas.