Noticias

Para facilitar a participación da cidadanía, os orzamentos participativos Compostela Decide achéganse durante esta semana aos centros socioculturais e celebran asembleas presenciais por zonas ou procesos. Tras a celebración onte dun encontro correspondente á zona Norte no CSC de Vite, o equipo técnico trasladarase hoxe, ás 20:00 horas, ao CSC de Santa Marta, onde están convocadas as persoas pertencentes aos barrios de Conxo, Vidán, Santa Marta e A Rocha (zona Sur).

GeoPlaneta, o selo editorial especializado en viaxes do grupo Planeta, vén de publicar a nova guía de viaxe polas cidades Patrimonio da Humanidade de España. A guía máis completa publicada sobre o conxunto destas 15 cidades españolas, con ilustracións descritivas de puntos de interese, planos xerais, despregables con información de utilidade para cada unha das cidades e máis de 600 fotografías para visualizar toda a súa beleza.

O alcalde reivindicou hoxe o papel de Santiago como "capital da lingua, que ten a responsabilidade de abrir camiño e mostrar o potencial do noso idioma". Foi durante a inauguración da xornada "A lingua como oportunidade", organizada polo Concello en colaboración coa UCCLA, a Unión de Cidades Capitais da Lingua Portuguesa.

A Banda Municipal de Música de Santiago e a Agrupación de Baile e Música Tradicional Brincadeira van colaborar nun concerto moi especial que terá lugar o xoves 13 na praza das Praterías. A concelleira Noa Morales presentou hoxe esta actuación, nunha rolda de prensa na que estivo acompañada polo director da Banda, Casiano Mouriño, e por dous dos profesores de Brincadeira, Felisa Segade e Xoán Porto.

O alcalde mantivo hoxe un encontro coa cantante Uxía, encargada do pregón que o venres abrirá as festas do Apóstolo. Martiño Noriega reiterou que "para a cidade é un motivo de orgullo que Uxía aceptara este encargo, porque é parte de Compostela". Tamén lembrou que ten "unha traxectoria espectacular no mundo da música, é unha referencia no país, embaixadora no espazo da lusofonía e pioneira no campo da música infantil".

Transparencia Internacional vén de facer público o Índice de Transparencia en Concellos relativo a 2017, e Santiago logra recuperar posicións ata acadar unha nota de 91,9 sobre 100. Hai só tres anos, en 2014, esa nota fora de tan só 66,3.

A Xunta de Goberno Local, na súa sesión ordinaria deste venres, aprobou as bases da convocatoria de subvencións para o deporte federado, ás que se van destinar 250.000 euros.

O ciclo Artellando volverá levar o ambiente festivo a toda a cidade, con máis de vinte actividades distintas programadas no marco do Apóstolo 2017. A tenente de alcalde María Rozas debullou hoxe a programación, nunha rolda de prensa na que tamén participaron representantes das entidades que participan do Artellando: Fran Rei, de Culturactiva; Mauro Sanín, da Central Folque; José Expósito, de Pista Catro; e Mariola Cerdeiro, de Urdime.

A concelleira de Políticas Sociais, Diversidade, Saúde e Centros Cívicos, Concha Fernández, presentou este venres a primeira convocatoria de axudas de cooperación ao desenvolvemento, que teñen como obxectivo realizar proxectos concretos en países empobrecidos. Na rolda tamén estivo o presidente da Coordinadora Galega de ONG, Alejandro Quiñoá.

Xa se pode consultar e levar para a casa o duodécimo número da revista Compostelánea, a publicación mensual elaborada por Turismo de Santiago e a Concellaría de Acción Cultural que informa da oferta turística, cultural e de ocio da cidade. Esta revista naceu en xullo de 2016 para ofrecer a habitantes e visitantes de Santiago unha guía práctica para sumarse con boa información á vida activa na cidade.